ചെന്നൈ: തമിഴ്‌നാട്ടിൽ സർക്കാർ രൂപീകരണത്തെച്ചൊല്ലിയുള്ള തർക്കം മുറുകുന്നതിനിടെ നാടകീയ നീക്കങ്ങളുമായി കോൺഗ്രസ്. എം.എൽ.എമാരെ ബി.ജെ.പി അടക്കമുള്ള എതിർചേരികൾ സ്വാധീനിക്കാൻ സാധ്യതയുണ്ടെന്ന വിലയിരുത്തലിനെത്തുടർന്ന് കോൺഗ്രസ് എം.എൽ.എമാരായ അഞ്ചു പേരെയും ഹൈദരാബാദിലേക്ക് മാറ്റി. ഇന്ന് രാവിലെയോടെയാണ് ഇവരെ അതീവ രഹസ്യമായി തെലങ്കാനയിലെ സുരക്ഷിത കേന്ദ്രത്തിലെത്തിച്ചത്.

മേലൂർ എം.എൽ.എയും തെലങ്കാനയിലെ മുൻ എ.ഐ.സി.സി ചുമതലക്കാരനുമായ പി. വിശ്വനാഥന്റെ നേതൃത്വത്തിലാണ് എം.എൽ.എമാരുടെ സംഘം ഹൈദരാബാദിലെത്തിയത്. തമിഴക വെട്രി കഴകം (ടി.വി.കെ) സർക്കാർ അധികാരത്തിൽ വരികയാണെങ്കിൽ പി. വിശ്വനാഥന് മന്ത്രിസ്ഥാനം ലഭിക്കുമെന്ന സൂചനകൾക്കിടെയാണ് എം.എൽ.എമാരെ മാറ്റിപ്പാർപ്പിക്കാനുള്ള നീക്കം പാർട്ടി നടത്തിയത്.

ടി.വി.കെക്ക് പിന്തുണയുമായി കോൺഗ്രസും ഇടതുകക്ഷികളും

നടൻ വിജയ് നയിക്കുന്ന തമിഴക വെട്രി കഴകത്തിന് കോൺഗ്രസ് ഇതിനകം പിന്തുണ പ്രഖ്യാപിച്ചിട്ടുണ്ട്. നിയമസഭാ തെരഞ്ഞെടുപ്പിൽ 108 സീറ്റുകൾ നേടി ഏറ്റവും വലിയ ഒറ്റകക്ഷിയായി മാറിയെങ്കിലും കേവലഭൂരിപക്ഷത്തിന് 10 സീറ്റുകളുടെ കുറവാണ് ടി.വി.കെ നേരിടുന്നത്.

ഡി.എം.കെ സഖ്യം ഉപേക്ഷിച്ചാണ് കോൺഗ്രസും ഇടതുകക്ഷികളും വിജയ്‌യെ പിന്തുണയ്ക്കാൻ തീരുമാനിച്ചത്. വി.സി.കെ കൂടി പിന്തുണ പ്രഖ്യാപിക്കുന്നതോടെ ഭൂരിപക്ഷം ഉറപ്പിക്കാമെന്നാണ് ടി.വി.കെയുടെ കണക്കുകൂട്ടൽ.

വിലപേശലുമായി വി.സി.കെ; ഗവർണറുടെ നിലപാട് നിർണ്ണായകം

രണ്ട് സീറ്റുകളുള്ള വി.സി.കെ (വിടുതലൈ ചിരുതൈഗൾ കച്ചി) പിന്തുണയ്ക്കായി കടുത്ത നിബന്ധനകളാണ് മുന്നോട്ട് വെക്കുന്നത്. പാർട്ടി അധ്യക്ഷൻ തിരുമാവളവനെ ഉപമുഖ്യമന്ത്രിയാക്കണമെന്നാണ് പ്രധാന ആവശ്യം. നിലവിൽ ചിദംബരത്ത് നിന്നുള്ള എം.പി കൂടിയാണ് അദ്ദേഹം.

അതേസമയം, ഭൂരിപക്ഷം തെളിയിക്കുന്ന കത്ത് ഹാജരാക്കാൻ സാധിക്കാത്തതിനെത്തുടർന്ന് വിജയ്‌യുടെ അവകാശവാദം ഗവർണർ രാജേന്ദ്ര ആർലേക്കർ മൂന്നാം തവണയും തള്ളി. 118 പേരുടെ പിന്തുണ വ്യക്തമാക്കുന്ന രേഖകൾ ഹാജരാക്കിയാൽ മാത്രമേ സർക്കാർ രൂപീകരണത്തിന് അനുമതി നൽകൂ എന്ന ഉറച്ച നിലപാടിലാണ് രാജ്ഭവൻ. ഗവർണറുടെ കടുത്ത നിലപാടും കുതിരക്കച്ചവട ഭീഷണിയും നിലനിൽക്കുന്ന സാഹചര്യത്തിൽ വരും ദിവസങ്ങൾ തമിഴ്നാട് രാഷ്ട്രീയത്തിന് അതീവ നിർണ്ണായകമാണ്.

amidst ongoing political instability in tamil nadu, the congress party has shifted its five mlas to a secure location in hyderabad to prevent potential poaching by rival parties.