ദുബൈ: നഗരത്തിലെ റോഡ് ശൃംഖലയുടെ കാര്യക്ഷമത വർദ്ധിപ്പിക്കുന്നതിനും ഗതാഗതക്കുരുക്ക് ലഘൂകരിക്കുന്നതിനുമുള്ള വൻകിട പദ്ധതിയുടെ ഭാഗമായി പുതിയ പാലം തുറന്ന് ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA). വേൾഡ് ട്രേഡ് സെന്റർ (WTC) റൗണ്ട്എബൗട്ട് വികസന പദ്ധതിയുടെ കീഴിൽ നിർമ്മിച്ച 500 മീറ്റർ നീളമുള്ള പാലമാണ് ഗതാഗതത്തിനായി തുറന്നുകൊടുത്തത്.

അൽ ബദായിൽ നിന്ന് ശൈഖ് റാഷിദ് സ്ട്രീറ്റിലേക്കും അൽ മുസ്തക്ബാൽ സ്ട്രീറ്റിലേക്കും പോകുന്ന വാഹനയാത്രക്കാർക്ക് ഈ പാലം വലിയ ആശ്വാസമാകും. തിരക്കേറിയ സമയങ്ങളിൽ ഈ ദൂരം പിന്നിടാൻ നേരത്തെ എട്ട് മിനിറ്റ് വരെ എടുത്തിരുന്നെങ്കിൽ, പുതിയ പാലം വരുന്നതോടെ ഇത് വെറും രണ്ട് മിനിറ്റായി കുറയും. മണിക്കൂറിൽ 1,200 വാഹനങ്ങളെ ഉൾക്കൊള്ളാൻ ശേഷിയുള്ളതാണ് ഈ ഒറ്റവരി പാലം.

അൽ ബദായിൽ നിന്ന് ഡിസംബർ 2 സ്ട്രീറ്റിലേക്കുള്ള യാത്ര സുഗമമാക്കുന്നതിനൊപ്പം ശൈഖ് റാഷിദ് റോഡ്, അൽ മുസ്തക്ബാൽ സ്ട്രീറ്റ് എന്നിവടങ്ങളിലേക്ക് നേരിട്ടുള്ള പ്രവേശനം പാലം ഉറപ്പാക്കുന്നു. ശൈഖ് സായിദ് റോഡിന് സമീപമുള്ള തന്ത്രപ്രധാന മേഖലയായതിനാൽ, പുതിയ ലിങ്കുകൾ ഗതാഗത വിതരണം മെച്ചപ്പെടുത്തുകയും പരിസര പ്രദേശങ്ങളിലെ കണക്റ്റിവിറ്റി ശക്തിപ്പെടുത്തുകയും ചെയ്യും.

പദ്ധതിയുടെ ഭാഗമായി ഡിസംബർ 2 സ്ട്രീറ്റിലെ സിഗ്നൽ ജംഗ്ഷൻ ഒരു 'ഫ്രീ-ഫ്ലോ' കവലയാക്കി മാറ്റുകയാണ്. ഇതോടെ വാഹനങ്ങൾക്ക് തടസ്സമില്ലാതെ വേഗത്തിൽ കടന്നുപോകാൻ സാധിക്കും. വേൾഡ് ട്രേഡ് സെന്റർ റൗണ്ട്എബൗട്ട് വികസന പദ്ധതിയിൽ ആകെ 5,000 മീറ്റർ വിസ്തൃതിയുള്ള ആറ് പാലങ്ങളാണ് ഉൾപ്പെടുന്നത്. ഇതിൽ നാല് പാലങ്ങളുടെ നിർമ്മാണം ഇതിനകം പൂർത്തിയായിക്കഴിഞ്ഞു.

ലോകത്തിലെ ഏറ്റവും മികച്ച ഗതാഗത സൗകര്യങ്ങളുള്ള നഗരമായി ദുബൈയെ മാറ്റുക എന്ന ലക്ഷ്യത്തിലേക്കുള്ള സുപ്രധാന ചുവടുവെപ്പാണ് പുതിയ പാലം. വരും മാസങ്ങളിൽ പദ്ധതിയുടെ ബാക്കി ഭാഗങ്ങൾ കൂടി പൂർത്തിയാകുന്നതോടെ ദുബൈയിലെ പ്രധാന ഇടനാഴികളിലെ ഗതാഗതക്കുരുക്കിന് ശാശ്വത പരിഹാരമാകുമെന്ന് ആർ.ടി.എ വ്യക്തമാക്കി.

ALSO READ: യുഎഇക്ക് നേരെയുണ്ടായ ഇറാന്റെ മിസൈൽ ആക്രമണം; ശക്തമായി അപലപിച്ച് അറബ് പാർലമെന്റ്

dubai roads and transport authority opened a new bridge to improve traffic flow and reduce travel time from eight minutes to just two. the project aims to ease congestion and enhance road connectivity.