ചൂട് കഠിനമായി വര്‍ധിച്ചുവരുന്ന സാഹചര്യത്തില്‍ നമ്മുടെ ആരോഗ്യകാര്യത്തിലും പ്രത്യേക ശ്രദ്ധ ആവശ്യമാണ്. ശരീരത്തിലെ ജലാംശം നഷ്ടപ്പെടുന്നത് തടയാനും ഉന്മേഷം നിലനിര്‍ത്താനും ധാരാളം വെള്ളം കുടിക്കേണ്ടതും അത്യാവശ്യമാണ്. എന്നാല്‍ പച്ചവെള്ളം കുടിക്കുന്നതിനു പുറമെ വേനല്‍ക്കാലത്ത് കഴിക്കേണ്ട ചില മികച്ച ആരോഗ്യപാനീയങ്ങള്‍ ഏതൊക്കെയാണെന്നു നോക്കാം.

ഇളനീര്‍ 

വീടുകളിലും കടകളിലുമൊക്കെ നമുക്ക് സുലഭമായി തന്നെ കിട്ടുന്ന ഒന്നാണ് ഇളനീര്‍. പ്രകൃതിദത്തമായ ഇലക്ട്രോലൈറ്റുകളുടെ കലവറയുമാണ് ഇളനീര്‍. ശരീരത്തിന് പെട്ടെന്ന് ഊര്‍ജ്ജം നല്‍കാനും ചൂട് കുറയ്ക്കാനും ഇളനീര്‍ സഹായിക്കുന്നു. പൊട്ടാസ്യം ധാരാളമായി അടങ്ങിയിട്ടുള്ളതിനാല്‍ ശരീരത്തിലെ ലവണാംശം നിലനിര്‍ത്താന്‍ ഇളനീര്‍ ഉത്തമമാണ്.

സംഭാരം അഥവാ മോരുംവെള്ളം 

വീടുകളിലൊക്കെ വേനല്‍കാലമായാല്‍  തന്നെ അമ്മമാര്‍ ഉണ്ടാക്കി വന്ന ഒന്നാണ് മോരും വെള്ളം. കുട്ടികള്‍ കളിച്ചു ദാഹിച്ചു വരുമ്പോള്‍ ഇവയാണ് കുടിക്കുക. അതായത്, മലയാളികളുടെ എക്കാലത്തെയും പ്രിയപ്പെട്ട വേനല്‍ക്കാല പാനീയം തന്നെയാണ് സംഭാരം.

ദഹനപ്രക്രിയ സുഗമമാക്കാനും വയറിനുണ്ടാകുന്ന അസ്വസ്ഥതകള്‍ കുറയ്ക്കാനും ഇതിലെ പ്രോബയോട്ടിക് ഗുണങ്ങള്‍ സഹായിക്കും. ഇഞ്ചി, പച്ചമുളക്, കറിവേപ്പില എന്നിവ ചേര്‍ക്കുന്നത് ഇതിന്റെ ഗുണം ഇരട്ടി വര്‍ധിപ്പിക്കും.

നാരങ്ങാവെള്ളം

നാരങ്ങ ഇല്ലാത്ത വീടുകള്‍ തന്നെ  കുറവായിരിക്കും. പ്രത്യേകിച്ചു വേനല്‍ കാലത്ത്. വിറ്റാമിന്‍ സി ധാരാളമായി അടങ്ങിയ നാരങ്ങാവെള്ളം പ്രതിരോധശേഷി വര്‍ധിപ്പിക്കാന്‍ സഹായിക്കുന്നതാണ്. പഞ്ചസാരയ്ക്ക് പകരം തേനോ ഉപ്പോ ചേര്‍ത്ത് കുടിക്കുന്നത് ശരീരത്തിലെ ഷുഗര്‍ ലെവല്‍ ബാലന്‍സ് ചെയ്യാനും സഹായിക്കും.

തണ്ണിമത്തന്‍ ജ്യൂസ്

90 ശതമാനത്തിലധികം ജലാംശമുള്ള പഴമാണ് തണ്ണിമത്തന്‍. വേനല്‍ക്കാലത്ത് തണ്ണിമത്തന്‍ ജ്യൂസായി കഴിക്കുന്നത് ശരീരത്തിലെ ചൂട് പെട്ടെന്ന് കുറയ്ക്കാന്‍ സഹായിക്കുന്നതാണ്. ഇതിലെ ലൈക്കോപീന്‍ ചര്‍മ്മത്തിന്റെ സംരക്ഷണത്തിനും വളരെ നല്ലതാണ്.

ALSO READ: കുഴിനഖം വിട്ടുമാറുന്നില്ലേ? ഇടയ്ക്കിടെ വരുന്നുണ്ടോ..? നഖങ്ങളുടെ ആരോഗ്യം സംരക്ഷിക്കാന്‍ ഇതാ ചില പോംവഴികള്‍

ജീരകവെള്ളവും നന്നാറി സര്‍ബത്ത്

രക്തം ശുദ്ധീകരിക്കാനും ദഹനം മെച്ചപ്പെടുത്താനും ജീരകവെള്ളം ഉത്തമമാണ്. അതുപോലെ തന്നെ നന്നാറി   ചേര്‍ത്തുണ്ടാക്കുന്ന സര്‍ബത്തുകള്‍ വേനല്‍ക്കാലത്ത് ശരീരത്തിന് വലിയ ആശ്വാസം നല്‍കും.

ശ്രദ്ധിക്കുക, അമിതമായി തണുപ്പിച്ച വെള്ളവും സോഫ്റ്റ് ഡ്രിങ്കുകളും ഒഴിവാക്കുന്നതാണ് ആരോഗ്യത്തിന് നല്ലത്. പുറത്തുപോകുമ്പോള്‍ എപ്പോഴും ഒരു കുപ്പി വെള്ളം കൈയില്‍ കരുതുക.

As temperatures soar, staying hydrated is crucial; here are five natural drinks like tender coconut and buttermilk to keep your body cool this summer.