ലഖ്നൗ: ഉത്തർപ്രദേശിൽ വിവാഹവിരുന്നിനിടെയുണ്ടായ കൂട്ടത്തല്ലിൽ യുവാവ് കൊല്ലപ്പെട്ടു. വരന്റെ സുഹൃത്തായ സുമിത് കുമാർ (26) ആണ് കൊല്ലപ്പെട്ടത്. വെള്ളിയാഴ്ച രാത്രി ഷാപൂർ പൊലിസ് സ്റ്റേഷൻ പരിധിയിലെ ബിച്ചിയയിൽ നടന്ന വിവാഹ ചടങ്ങിനിടെയായിരുന്നു സംഭവം.

ശുചീകരണ തൊഴിലാളിയായ സമീർ കുമാറിന്റെ വിവാഹഘോഷമാണ് കലാപഭൂമിയായി മാറിയത്. വിവാഹത്തിൽ അതിഥികൾ നൃത്തം ചെയ്യുന്നതിനിടെയാണ് തർക്കങ്ങൾ ആരംഭിച്ചത്. ഇത് പിന്നീട് ഭക്ഷണശാലയിലേക്ക് നീണ്ടു. ഭക്ഷണശാലയിൽ ചിക്കൻ വിളമ്പുന്നതിനിടെ ഉന്തും തള്ളുമുണ്ടാവുകയും ഒരാളുടെ വസ്ത്രത്തിലേക്ക് ചിക്കൻ കറി തെറിക്കുകയും ചെയ്തു. ഇത് വീണ്ടും വാക്കേറ്റത്തിന് കാരണമായി. ഇത് പിന്നീട് വലിയ സംഘർഷത്തിലേക്ക് മാറുകയായിരുന്നുവെന്ന് എസ്.പി നിമിഷ് ദശരഥ് പാട്ടീൽ വ്യക്തമാക്കി.

ALSO READ: സർക്കാർ നീക്കം ഏകപക്ഷീയം; പൊതുഗതാഗത സംവിധാനം തകരും; കെഎസ്ആർടിസിയിൽ സ്ത്രീകൾക്ക് സൗജന്യയാത്ര, പ്രതിഷേധവുമായി സ്വകാര്യ ബസ് ഉടമകൾ

തുടർന്ന്, വരന്റെ വീട്ടുകാരും നാട്ടുകാരും തമ്മിൽ ഏറ്റുമുട്ടലുണ്ടായി. വടികളും ബെൽറ്റുകളും ഇഷ്ടികകളും ഉപയോഗിച്ചായിരുന്നു ആക്രമണം. സംഘർഷത്തിൽ ഗുരുതരമായി പരുക്കേറ്റ സുമിത് കുമാറിനെ ശനിയാഴ്ച ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അതേസമയം, സംഭവത്തിൽ പരുക്കേറ്റ മറ്റ് ആറ് പേർ പരുക്കുകളോടെ ബി.ആർ.ഡി മെഡിക്കൽ കോളേജിൽ ചികിത്സയിലാണ്. 

സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ടെങ്കിലും പൊലിസ് ഇതിന്റെ ആധികാരികത പരിശോധിച്ചു വരികയാണ്. കേസിൽ ഏഴ് പേരെ പൊലിസ് ഇതിനകം അറസ്റ്റ് ചെയ്തിട്ടുണ്ട്.