ഡൽഹി: കേരളത്തിലെ മുഖ്യമന്ത്രി പ്രഖ്യാപനം 48 മണിക്കൂറിനുളളിൽ ഉണ്ടാകുമെന്ന് മുതിർന്ന കോൺഗ്രസ് നേതാവ് കെ. മുരളീധരൻ. ദീപ ദാസ് മുൻഷി വിളിച്ചെന്നും നാളെ ഡൽഹിയിലെത്താൻ ആവശ്യപ്പെട്ടതായും അദ്ദേഹം വ്യക്തമാക്കി. മുഖ്യമന്ത്രി ചർച്ചക്ക് ആയിരിക്കാം വിളിച്ചതെന്നും, നാളെയോ മറ്റന്നാളോ തീരുമാനം ഉണ്ടാകാമെന്നും അദ്ദേ​ഹം കൂട്ടിച്ചേർത്തു. 

നാളെ രാവിലെ ഡൽഹിയിലേക്ക് പോകും. ഹൈക്കമാൻഡ് നിരീക്ഷകരോട് തന്റെ നിലപാടുകൾ നേരത്തെ തന്നെ വ്യക്തമാക്കിയിട്ടുള്ളതാണെന്നും മുരളീധരൻ പറഞ്ഞു.

എംഎൽഎമാരുടെ പിന്തുണ സംബന്ധിച്ച് പുറത്തുവരുന്ന വാർത്തകൾ ശരിയാകണമെന്നില്ല. "നിങ്ങൾ പറയുന്ന പിന്തുണ ആയിരിക്കില്ലല്ലോ ശരിയായ പിന്തുണ" എന്നായിരുന്നു പിന്തുണ സംബന്ധിച്ച ചോദ്യത്തിന് മുരളീധരന്റെ മറുപടി.

കെ.വി. തോമസിന്റെ പുസ്തകത്തെക്കുറിച്ച് ചോദിച്ചപ്പോൾ "ഇപ്പോൾ സ്ഥാനം പോയില്ലേ, ഇനി പുസ്തകം എഴുതാമല്ലോ" എന്ന് അദ്ദേഹം പറഞ്ഞു. തങ്ങൾ രാഷ്ട്രീയത്തിൽ നിന്ന് മാറുമ്പോൾ മാത്രമേ പുസ്തകം എഴുതുന്നതിനെക്കുറിച്ച് ആലോചിക്കുന്നുള്ളൂവെന്നും അദ്ദേഹം കൂട്ടിച്ചേർത്തു.