റിയാദ്: സഊദി അറേബ്യയിലേക്ക് കടത്താൻ ശ്രമിച്ച വൻ ലഹരിമരുന്ന് ശേഖരം സകാത്ത്-ടാക്സ് ആൻഡ് കസ്റ്റംസ് അതോറിറ്റി പിടികൂടി. ട്രക്കിന്റെ സ്പെയർ ടയറിനുള്ളിൽ ഒളിപ്പിച്ച നിലയിലായിരുന്ന 4,26,162 ആംഫെറ്റാമൈൻ ഗുളികകളാണ് ഉദ്യോഗസ്ഥർ കണ്ടെടുത്തത്. അൽ-ഹദീസ അതിർത്തി കടന്നുവന്ന ട്രക്കിനുള്ളിലാണ് ഇവ കണ്ടെത്തിയത്. മയക്കുമരുന്ന് കടത്തിനെതിരേ വ്യാപക പരിശോധനയാണ് രാജ്യത്തുടനീളം നടന്നുക്കൊണ്ടിരിക്കുന്നത്. രാജ്യത്തിന് ഭീഷണിയുയർത്തുന്ന അനധികൃത വസ്തുക്കൾ തടയാൻ അതോറിറ്റി പ്രതിജ്ഞാബദ്ധമാണെന്ന് സകാത്ത്-ടാക്സ് ആൻഡ് കസ്റ്റംസ് അതോറിറ്റി വക്താവ് ഹമൂദ് അൽ-ഹർബി വ്യക്തമാക്കി. എല്ലാ പ്രവേശന കവാടങ്ങളിലും കർശനമായ പരിശോധന തുടരുകയാണ്.

ALSO READ: ഞായറാഴ്ച മാസപ്പിറവി നിരീക്ഷിക്കാന്‍ സഊദി സുപ്രിംകോടതിയുടെ ആഹ്വാനം

മയക്കുമരുന്ന് നിയന്ത്രണ വിഭാഗവുമായി സഹകരിച്ച് ലഹരിക്കടത്ത് പൂർണമായും ഇല്ലാതാക്കാനാണ് സർക്കാർ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു. ലഹരി മരുന്ന് വിൽക്കുന്നവരെക്കുറിച്ച് വിവരങ്ങൾ ലഭിക്കുന്നവർ ബന്ധപ്പെട്ട ഉദ്യോ​ഗസ്ഥരെ വിവരമറിയിക്കണമെന്നും വിവരമറിയിക്കുന്നവരുടെ വിവരങ്ങൾ അതീവ രഹസ്യമായി സൂക്ഷിക്കുമെന്നും അതോറിറ്റി വ്യക്തമാക്കി. സെക്യൂരിറ്റി നമ്പർ: 1910, ഇ-മെയിൽ: [email protected], അന്താരാഷ്ട്ര നമ്പർ: 009661910 എന്നീ നമ്പറിൽ വിവരമറിയിക്കണമെന്നും അതോറിറ്റി വ്യക്തമാക്കി. ദേശീയ സുരക്ഷ ഉറപ്പാക്കുന്നതിനായി പൊതുജന പങ്കാളിത്തം ആവശ്യമാണെന്നും അതോറിറ്റിയുമായി സഹകരിക്കണമെന്നും ഉദ്യോ​ഗസ്ഥർ അഭ്യർഥിച്ചു.  

Saudi Arabia's ZATCA foils an attempt to smuggle over 426,000 amphetamine pills hidden in a truck's spare tire at the Al-Haditha border. Authorities urge the public to report smuggling via the 1910 security hotline.