തൃശൂർ: തൃശൂരിൽ ഇടഞ്ഞ ആനയെ തളച്ചു. പാറമേക്കാവ് ക്ഷേത്രത്തിന് സമീപത്ത് വച്ച ഇടഞ്ഞ ആന കാറുകളും ഓട്ടോയും ബൈക്കുകളും വീടുകളുടെ മതിലുകളും ഉൾപ്പെടെ തകർത്തിരുന്നു. ആനയെ കൊല്ലത്ത് നിന്നു ഫോട്ടോഷൂട്ടിനായി എത്തിച്ചതാണ് എന്നാണ് വിവരം. ആന ഒരു കാറിന് നേരെ ആക്രമണം നടത്തുമ്പോൾ കാറോടിച്ചിരുന്ന സ്ത്രീ കാറിൽ ഉണ്ടായിരുന്നെങ്കിലും ഇവരെ നാട്ടുകാർ അദ്ഭുതകരമായി രക്ഷപ്പെടുത്തുകയായിരുന്നു. ഇന്ന് രാവിലെ പാറമേക്കാവ് ക്ഷേത്രത്തിൽ തൊഴാൻ കൊണ്ടുപോയ ശേഷം തിരികെ കൊണ്ടുവരുന്നതിനിടെയാണ് ആന ഇടഞ്ഞത്. പട്ടിയെ കണ്ട് പേടിച്ച് ആന ഓടുകയായിരുന്നുവെന്നാണ് പാപ്പാൻ പറയുന്നത്. കൊല്ലം സ്വദേശിയുടെ ഉടമസ്ഥതയിലുള്ള ശിവ ലക്ഷ്മി അയ്യപ്പൻ എന്ന ആനയാണ് ഇടഞ്ഞത്. പാറമേക്കാവിലെ വിവിധ വഴികളിലൂടെ കിലോമീറ്ററുകളോളം ഓടിയ ആനയെ ഏറെ നേരം പണിപ്പെട്ട് ഗാന്ധിനഗറിൽ വച്ചാണ് തളച്ചത്. എലിഫന്റ് സ്ക്വാഡ് അടക്കം സ്ഥലത്തെത്തിയിരുന്നു.