ജയ്പൂർ: ഐ.പി.എൽ ചരിത്രത്തിൽ ഇതുവരെ ആരും കാണാത്ത വിധം റെക്കോർഡുകൾ ഒന്നൊഴിയാതെ അടിച്ചുടച്ച് രാജസ്ഥാൻ റോയൽസിന്റെ കൗമാര വിസ്മയം വൈഭവ് സൂര്യവംശി. സൺറൈസേഴ്സ് ഹൈദരാബാദിനെതിരായ ഹൈ-വോൾട്ടേജ് എലിമിനേറ്റർ പോരാട്ടത്തിലാണ് വൈഭവ് സിക്സറുകളുടെ പെരുമഴ തീർത്തത്. മത്സരത്തിൽ വെറും 29 പന്തിൽ 12 സിക്സറുകളുടെ അകമ്പടിയോടെ 97 റൺസടിച്ചുകൂട്ടിയ താരം, ഐ.പി.എൽ ചരിത്രത്തിൽ ഒരു സീസണിൽ ഏറ്റവും കൂടുതൽ സിക്സറുകൾ നേടുന്ന ബാറ്ററെന്ന സർവ്വകാല റെക്കോർഡ് സ്വന്തം പേരിലാക്കി.

തന്റെ കരിയറിലെ രണ്ടാം സീസൺ മാത്രം കളിക്കുന്ന ഈ കൗമാരക്കാരൻ 15 മത്സരങ്ങളിൽ നിന്ന് പറത്തിയത്  65 സിക്സറുകളാണ്. 2012-ൽ റോയൽ ചലഞ്ചേഴ്സ് ബെംഗളൂരുവിനായി 59 സിക്സറുകൾ അടിച്ചുകൂട്ടിയ ‘യൂണിവേഴ്സ് ബോസ്’ ക്രിസ് ഗെയ്‌ലിന്റെ 14 വർഷം പഴക്കമുള്ള റെക്കോർഡാണ് വൈഭവ് സൂര്യവംശി എന്ന ഇന്ത്യൻ താരം പഴങ്കഥയാക്കിയത്.

He's just getting started 😉

Vaibhav Sooryavanshi 🆚 Pat Cummins 🍿

Updates ▶️ https://t.co/OBIYYIuhbt #TATAIPL | #Eliminator | #TheFinalLeap | #SRHvRR pic.twitter.com/RYzAAbeVCZ

— IndianPremierLeague (@IPL) May 27, 2026

സെഞ്ച്വറി റെക്കോർഡിന് തൊട്ടരികെ വീഴ്ച; ജയസൂര്യയും റെയ്നയും വഴിമാറി!

ക്രിസ് ഗെയ്‌ലിന്റെ തന്നെ പേരിലുള്ള ഐ.പി.എല്ലിലെ അതിവേഗ സെഞ്ച്വറി (30 പന്തിൽ) റെക്കോർഡിന് തൊട്ടരികെയാണ് വൈഭവ് നിർഭാഗ്യവശാൽ പുറത്തായത്. 28 പന്തിൽ 97 റൺസിലെത്തിയ താരം ഗെയ്‌ലിന്റെ റെക്കോർഡ് മറികടക്കാനുള്ള ശ്രമത്തിൽ പ്രഫുൽ ഹിംഗെയുടെ പന്തിൽ തേർഡ് മാനിൽ സ്മരൺ രവിചന്ദ്രന് ക്യാച്ച് നൽകി മടങ്ങുകയായിരുന്നു. 12 സിക്സും 5 ഫോറുമടങ്ങുന്നതായിരുന്നു ആ വിസ്മയകരമായ ഇന്നിങ്സ്.

ഈ ഒറ്റ ഇന്നിങ്സോടെ തകർന്ന മറ്റ് പ്രധാന റെക്കോർഡുകൾ:

• അതിവേഗ പ്ലേ-ഓഫ് അർധസെഞ്ച്വറി: വെറും 16 പന്തിൽ (8 സിക്സോടെ) സീസണിലെ അഞ്ചാം അർധസെഞ്ച്വറി തികച്ച താരം, ഐ.പി.എൽ നോക്കൗട്ട് ഘട്ടത്തിലെ അതിവേഗ ഫിഫ്റ്റിയെന്ന സുരേഷ് റെയ്നയുടെ റെക്കോർഡിനൊപ്പമെത്തി.
• പവർപ്ലേയിലെ സിക്സർ വേട്ട: പവർപ്ലേ ഓവറുകളിൽ മാത്രം താരം ഇന്ന് 8 സിക്സറുകൾ പറത്തി. 2008-ൽ ചെന്നൈക്കെതിരെ മുംബൈക്കായി 7 സിക്സറുകൾ അടിച്ച സനത് ജയസൂര്യയുടെ റെക്കോർഡാണ് തകർന്നത്.
• പവർപ്ലേയിൽ കൂടുതൽ റൺസ്: ഒരു സീസണിൽ പവർപ്ലേയിൽ ഏറ്റവും കൂടുതൽ റൺസ് നേടുന്ന താരമെന്ന ഡേവിഡ് വാർണറുടെ (2016-ൽ 467 റൺസ്) റെക്കോർഡും വൈഭവ് (490 റൺസ്) മറികടന്നു.

ഗെയ്‌ലിനെ മറികടക്കാൻ വേണ്ടിയിരുന്നത് 7 സിക്സുകൾ; കമിൻസിനെതിരെ ഹാട്രിക് സിക്സ്!

ഒരു ഐ.പി.എൽ സീസണിൽ 50 സിക്സറുകൾ തികയ്ക്കുന്ന ആദ്യ ഇന്ത്യൻ ബാറ്ററെന്ന നേട്ടം നേരത്തെ സ്വന്തമാക്കിയ വൈഭവിന്, ഗെയ്‌ലിനെ മറികടക്കാൻ മത്സരത്തിന് മുമ്പ് 7 സിക്സുകളായിരുന്നു വേണ്ടിയിരുന്നത്. ഹൈദരാബാദ് ക്യാപ്റ്റൻ പാറ്റ് കമിൻസ് എറിഞ്ഞ ആദ്യ ഓവറിലെ അവസാന പന്ത് സിക്സറിന് തൂക്കിയാണ് താരം തുടങ്ങിയത്.

We are out of words 👏👏

9⃣7⃣(29) of absolute force from Vaibhav Sooryavanshi 🔥🔥

Updates ▶️ https://t.co/OBIYYIuhbt #TATAIPL | #Eliminator | #TheFinalLeap | #SRHvRR pic.twitter.com/gtt63Wwkx1

— IndianPremierLeague (@IPL) May 27, 2026

രണ്ടാം ഓവറിൽ ഇഷാൻ മലിംഗക്കെതിരെയും സിക്സർ നേടി. മൂന്നാം ഓവറിൽ പാറ്റ് കമിൻസിനെതിരെ തുടർച്ചയായി 3 സിക്സറുകൾ (ഹാട്രിക് സിക്സ്) പറത്തിയ വൈഭവ്, തൊട്ടടുത്ത ഓവറിൽ സാക്കിബ് ഹുസൈനെ സിക്സറിന് പറത്തി ഗെയ്‌ലിനൊപ്പമെത്തി. അതേ ഓവറിലെ അടുത്ത പന്തും ഗാലറിയിലെത്തിച്ച് ഗെയ്‌ലിനെ പിന്നിലാക്കി താരം ചരിത്രത്തിന്റെ നെറുകയിലെത്തി.

ഓറഞ്ച് ക്യാപ്പും വൈഭവിന്റെ കൈകളിലേക്ക്

ലീഗ് ഘട്ടത്തിൽ ഇതേ ഹൈദരാബാദിനെതിരെ 37 പന്തിൽ 103 റൺസ് (12 സിക്സ്) നേടി ഒരു ഇന്നിങ്സിൽ കൂടുതൽ സിക്സർ നേടുന്ന ഇന്ത്യൻ താരമെന്ന റെക്കോർഡ് വൈഭവ് സ്വന്തമാക്കിയിരുന്നു. ഇന്നത്തെ വെടിക്കെട്ടോടെ ഈ സീസണിൽ 15 മത്സരങ്ങളിൽ നിന്നായി 680 റൺസ് നേടിയ രാജസ്ഥാൻ താരം ടൂർണമെന്റിലെ റൺവേട്ടക്കാരിൽ ഒന്നാം സ്ഥാനത്തെത്തി ഓറഞ്ച് ക്യാപ്പും സ്വന്തമാക്കി. വൈഭവിന്റെ ഈ ‘ആറാട്ടിന്റെ’ കരുത്തിൽ രാജസ്ഥാൻ റോയൽസ് പവർപ്ലേയിൽ 80 റൺസും, ഓപ്പണിങ് വിക്കറ്റിൽ 8 ഓവറിൽ 125 റൺസും അടിച്ചുകൂട്ടി ശക്തമായ നിലയിലാണ്.14 ഓവർ പിന്നിടുമ്പോൾ 3 വിക്കറ്റ് നഷ്ടത്തിൽ 192 റൺസ് നേടിയിട്ടുണ്ട്.