മലപ്പുറം: പരീക്ഷ ജയിച്ചിട്ടും വെബ്‌സൈറ്റിൽ തോറ്റെന്ന് കാണിക്കുന്നതിനാൽ തുടർപഠനത്തിന് അപേക്ഷിക്കാനാതെ ശ്രീനാരായണഗുരു ഓപൺ സർവകലാശാല വിദ്യാർഥികൾ. 

സർവകലാശാലയിൽ വിദൂര വിദ്യാഭ്യാസ കോഴ്‌സുകളിൽ പഠനം പൂർത്തിയാക്കിയ വിദ്യാർഥികളുടെ തുടർപഠന സാധ്യതകളാണ് വൈബ്‌സൈറ്റിൽ റിസൾട്ട് അപ്ഡേറ്റ് ചെയ്യാത്തതിനാൽ മങ്ങുന്നത്. ഡിഗ്രി, പി.ജി കോഴ്‌സുകളിൽ വിവിധ സെമസ്റ്ററുകളിലായി സപ്ലിമെന്ററി പരീക്ഷയെഴുതിയ വിദ്യാർഥികൾക്കാണ് ഈ ദുരവസ്ഥ. പരീക്ഷാഫലം  പരിശോധിക്കാനുള്ള പോർട്ടലിൽ ചില വിഷയങ്ങളുടെ ഫലം തടഞ്ഞുവച്ചതായി കാണിക്കുന്നുണ്ട്. അതേസമയം സ്റ്റുഡന്റ്‌സ് പോർട്ടലിൽ ചില വിഷയങ്ങളിൽ വിജയിച്ചവി ദ്യാർഥികൾ പരാജയപ്പെട്ടെന്നാണുള്ളത്. 
ഇൗ വിദ്യാർഥികൾ വിജയിച്ചിട്ടുണ്ടെന്നും വെബ്‌സൈറ്റ് അപ്‌ഡേഷൻ നടക്കുന്നതിനാലാണ് വ്യത്യസ്ത റിസൾട്ടുകൾ കാണിക്കുന്നതെന്നുമാണ് സർവകലാശാല പറയുന്നത്. ഡിഗ്രി പരീക്ഷയുടെ ഗ്രേഡ് കാർഡും സർട്ടിഫിക്കറ്റും ലഭിക്കാൻ സ്റ്റുഡന്റ്‌സ് പോർട്ടലിലാണ് അപേക്ഷ സമർപ്പിക്കേണ്ടത്. പോർട്ടലിൽ പരീക്ഷയിൽ തോറ്റതായി കാണിക്കുന്നതിനാൽ ഇവർക്ക് ഗ്രേഡ് കാർഡിന് അപേക്ഷിക്കാനാവില്ല.  

ഇക്കാരണത്താൽ സപ്ലിമെന്ററി റിസൾട്ട് പുറത്തുവന്ന് മൂന്ന് മാസം പിന്നിട്ടിട്ടും ചില വിദ്യാർഥികൾക്ക് സർട്ടിഫിക്കറ്റ് ലഭിച്ചിട്ടില്ല.  അതിനാൽ ഇവരുടെ തുടർപഠന സാധ്യതകളും മങ്ങുകയാണ്. 

കാരണം ഡാറ്റ മൈഗ്രേഷൻ, 15 നകം പൂർത്തിയാകും: വി.സി

സർവകലാശാലയുടെ വെബ്‌സൈറ്റുകളിൽ നിന്നും  ഡാറ്റകൾ കൈമാറ്റം നടക്കുന്നതിനാലാണ് സപ്ലിമെന്ററി പരീക്ഷാഫലത്തിൽ വിദ്യാർഥികൾക്ക് പ്രശ്‌നങ്ങൾ നേരിടുന്നതെന്ന് ശ്രീനാരായണ ഗുരു ഓപ്പൺ സർവകലാശാല വൈസ് ചാൻസലർ ഡോ. വി.പി ജഗതിരാജ് പറഞ്ഞു. ജൂൺ 15 നകം വെബ്‌സൈറ്റിലെ പ്രശ്‌നങ്ങൾ പൂർണമായും പരിഹരിക്കുമെന്നും വി.സി പറഞ്ഞു.