മുംബൈ: ഇന്ത്യൻ ക്രിക്കറ്റ് ലോകത്തെ ഞെട്ടിച്ചുകൊണ്ട് ട്വന്റി-20 ടീമിൽ വലിയ അഴിച്ചുപണിക്കൊരുങ്ങി ബിസിസിഐ (BCCI). നിലവിലെ ടി20 നായകൻ സൂര്യകുമാർ യാദവിനെ ക്യാപ്റ്റൻ സ്ഥാനത്തുനിന്നും മാറ്റിയതായാണ് പുറത്തുവരുന്ന സൂചനകൾ. ക്യാപ്റ്റൻസി തെറിച്ചതിന് പിന്നാലെ ഒരു കളിക്കാരൻ എന്ന നിലയിലും സൂര്യകുമാറിനെ ഇനി ഇന്ത്യയുടെ ടി20 ടീമിലേക്ക് പരിഗണിക്കില്ലെന്ന് ദേശീയ മാധ്യമമായ 'ദി ഇന്ത്യൻ എക്സ്പ്രസ്' റിപ്പോർട്ട് ചെയ്തു.

ഇതോടെ ന്യൂസിലൻഡിനെതിരെ നടന്ന 2026-ലെ ടി20 ലോകകപ്പ് ഫൈനൽ മത്സരമാകും സൂര്യകുമാറിന്റെ കരിയറിലെ അവസാന അന്താരാഷ്ട്ര ടി20 മത്സരം. ഈ മാസം നടക്കുന്ന അയർലൻഡ് പര്യടനത്തോടെ ശ്രേയസ് അയ്യർ ഇന്ത്യൻ ടി20 ടീമിന്റെ പുതിയ നായകനായി ചുമതലയേറ്റെടുക്കുമെന്നാണ് സൂചന.

ലോകകപ്പ് നേടിയിട്ടും 'സ്കൈ'ക്ക് പുറത്തേക്കുള്ള വഴി തെളിഞ്ഞത് എങ്ങനെ?

2024 ജൂലൈയിൽ രോഹിത് ശർമ്മ വിരമിച്ചതിനെത്തുടർന്നാണ് ഹാർദിക് പാണ്ഡ്യയെ മറികടന്ന് സൂര്യകുമാർ യാദവ് ഇന്ത്യയുടെ ടി20 നായകനാകുന്നത്. സൂര്യകുമാറിന്റെ ക്യാപ്റ്റൻസിക്ക് കീഴിൽ ടീം ഇന്ത്യ ചരിത്രപരമായ തുടർജയങ്ങളാണ് സ്വന്തമാക്കിയത്. തുടർച്ചയായ 8 ദ്വിരാഷ്ട്ര പരമ്പര വിജയങ്ങൾ, 2025-ലെ ഏഷ്യാ കപ്പ് കിരീടം, ഒടുവിൽ 2026-ലെ ടി20 ലോകകപ്പ് കിരീടം എന്നിവയെല്ലാം സൂര്യക്ക് കീഴിൽ ഇന്ത്യ സ്വന്തമാക്കി. എന്നാൽ ടീം ജയിക്കുമ്പോഴും ക്യാപ്റ്റന്റെ ബാറ്റിംഗിലെ മോശം ഫോമാണ് തിരിച്ചടിയായത്.

🚨 BREAKING - SURYAKUMAR YADAV REMOVED AS INDIA T20 CAPTAIN 🚨

- Surya also set to lose his place in India T20 team as well. (Devendra Pandey). pic.twitter.com/5cLsdc14iY

— Tanuj (@ImTanujSingh) June 3, 2026

2025-ന്റെ തുടക്കം മുതൽ കളിച്ച 25 അന്താരാഷ്ട്ര ടി20 മത്സരങ്ങളിൽ വെറും 12.84 എന്ന മോശം ശരാശരി മാത്രമാണ് സൂര്യകുമാറിനുള്ളത്. ഈ വർഷത്തെ ഐപിഎല്ലിലും മുംബൈ ഇന്ത്യൻസ് താരമായ സൂര്യകുമാറിന് വെറും 270 റൺസ് മാത്രമാണ് നേടാനായത്. മുഖ്യപരിശീലകൻ ഗൗതം ഗംഭീറുമായി സെലക്ഷൻ കമ്മിറ്റിയും ബിസിസിഐയും നടത്തിയ നിർണായക ചർച്ചകൾക്കൊടുവിലാണ് സൂര്യകുമാറിനെ മാറ്റാനുള്ള കടുത്ത തീരുമാനം എടുത്തത്.

ഭാവി മുൻനിർത്തി യുവതലമുറയിലേക്ക്; ശ്രേയസ് അയ്യർ നായകനായേക്കും

സൂര്യകുമാറിന്റെ നേതൃത്വത്തിൽ ടീം ലോകകപ്പ് നേടിയെങ്കിലും, അദ്ദേഹത്തിന്റെ നിലവിലെ മോശം ഫോമും പ്രായവും കണക്കിലെടുത്ത് ടി20 ടീമിന്റെ ഭാവി മുൻനിർത്തി മുന്നോട്ട് പോകാനാണ് മാനേജ്‌മെന്റ് തീരുമാനം. സൂര്യയെ ഇനി കളിക്കാരനായും ടീമിലേക്ക് പരിഗണിക്കില്ലെന്ന കടുത്ത നിലപാടിലാണ് സെലക്ടർമാർ. ഈ തീരുമാനം ഉടൻ തന്നെ താരത്തെ ഔദ്യോഗികമായി അറിയിക്കും.

ചീഫ് സെലക്ടർ അജിത് അഗാർക്കറുടെ പൂർണ്ണ പിന്തുണയോടെ ശ്രേയസ് അയ്യർ പുതിയ ടി20 നായകനാകുമെന്നാണ് റിപ്പോർട്ട്. അയർലൻഡിനെതിരെയുള്ള രണ്ട് മത്സരങ്ങളുടെ പരമ്പരയ്ക്ക് മുന്നോടിയായി പുതിയ നായകന്റെ ഔദ്യോഗിക പ്രഖ്യാപനം ഉണ്ടായേക്കും.