കാസര്‍കോട്: അംഗടിമുഗര്‍ ഗവ. ഹയര്‍സെക്കന്‍ഡറി സ്‌കൂളില്‍ സ്ഥാപിച്ച കമാനത്തില്‍ സി.പി.എം ലോക്കല്‍ കമ്മിറ്റിയുടെ പേര് രേഖപ്പെടുത്തിയതിനെ ചൊല്ലി വിവാദം. പിന്നാലെ കമാനത്തില്‍ നിന്ന് പാര്‍ട്ടിയുടെ പേര് നീക്കി. ഇന്നലെ പുലര്‍ച്ചെയോടെയാണ് സി.പി.എം നേതൃത്വം തന്നെ പേര് നീക്കിയത്. 

സര്‍ക്കാര്‍ വിദ്യാഭ്യാസ സ്ഥാപനത്തിന്റെ പരിസരത്ത് രാഷ്ട്രീയപാര്‍ട്ടിയുടെ പേരില്‍ കമാനം സ്ഥാപിച്ചതും അതിന്റെ ഉദ്ഘാടനം ജില്ലാ പഞ്ചായത്ത് പ്രസിഡന്റ് സാബു അബ്രഹാം നിര്‍വഹിച്ചതും വലിയ വിവാദങ്ങള്‍ക്ക് വഴിവച്ചിരുന്നു. വിഷയം തിങ്കളാഴ്ച ചേര്‍ന്ന ജില്ലാ പഞ്ചായത്ത് യോഗത്തിലും ശക്തമായ പ്രതിഷേധത്തിനും അരമണിക്കൂറിലേറെ നീണ്ട ബഹളത്തിനും കാരണമായിരുന്നു. 

പുത്തിഗെ ഡിവിഷനില്‍ നിന്നുള്ള കോണ്‍ഗ്രസ് അംഗം സോമശേഖരയാണ് വിഷയം യോഗത്തില്‍ അവതരിപ്പിച്ചിരുന്നത്. തുടര്‍ന്ന് മുസ്‌ലിം ലീഗ് അംഗങ്ങളായ പി.ബി ഷഫീഖ്, അസീസ് കളത്തൂര്‍, കോണ്‍ഗ്രസ് അംഗം ഹര്‍ഷദ് വോര്‍ക്കാടി ഉള്‍പ്പെടെയുള്ള പ്രതിപക്ഷ അംഗങ്ങള്‍ ശക്തമായ വിമര്‍ശനം ഉന്നയിച്ചു. വിദ്യാഭ്യാസ സ്ഥാപനങ്ങളില്‍ രാഷ്ട്രീയ പാര്‍ട്ടികളുടെ പേരുകള്‍ രേഖപ്പെടുത്തുന്നത് അംഗീകരിക്കാനാവില്ലെന്ന് അവര്‍ ചൂണ്ടിക്കാട്ടിയിരുന്നു.

ചര്‍ച്ച രൂക്ഷമായതോടെ വിഷയം സംബന്ധിച്ച് അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ജില്ലാ പഞ്ചായത്ത് സെക്രട്ടറിയെ ചുമതലപ്പെടുത്തുന്നതായി പ്രസിഡന്റ് സാബു അബ്രഹാം പ്രഖ്യാപിച്ചിരുന്നു. വിദ്യാഭ്യാസ സ്ഥാപനങ്ങളില്‍ സ്‌പോണ്‍സര്‍മാരുടെയോ സംഘടനകളുടെയോ പേരുകള്‍ രേഖപ്പെടുത്തുന്നത് നിയമപരമായും ഭരണപരമായും അനുവദനീയമാണോയെന്നതടക്കമുള്ള കാര്യങ്ങള്‍ പരിശോധിക്കുമെന്നും അദ്ദേഹം അറിയിച്ചിരുന്നു.

ജില്ലാപഞ്ചായത്ത് യോഗത്തില്‍ വിഷയം വലിയ വിവാദമായതിന് പിന്നാലെയാണ് സി.പി.എം നേതൃത്വം കമാനത്തില്‍ നിന്ന് പാര്‍ട്ടിയുടെ പേര് നീക്കാന്‍ തീരുമാനിച്ചത്. ഇതോടെ കഴിഞ്ഞ ഏതാനും ദിവസങ്ങളായി ഉണ്ടായ രാഷ്ട്രീയ വിവാദങ്ങള്‍ക്ക് ഇടയാക്കിയ വിഷയത്തില്‍ പുതിയ വഴിത്തിരിവാണ് ഉണ്ടായിരിക്കുന്നത്. വിഷയത്തില്‍ കെ.എസ്.യു നേതൃത്വം വിദ്യാഭ്യാസ മന്ത്രിക്ക് പരാതി നല്‍കിയിട്ടുണ്ട്.

A controversy erupted after the name of the CPI(M) was reportedly displayed at the entrance of a government school. The issue drew criticism from various quarters, with concerns raised about the use of political identifiers on public educational institution premises.