ദുബൈ: ദുബൈ അന്താരാഷ്ട്ര വിമാനത്താവളത്തിൽ വന്യജീവി കടത്തിനുള്ള ശ്രമം പരാജയപ്പെടുത്തി ദുബൈ കസ്റ്റംസ് അധികൃതർ. വിമാനത്താവളത്തിൽ ആരും അവകാശപ്പെടാനില്ലാതെ ഉപേക്ഷിക്കപ്പെട്ട നിലയിൽ കണ്ടെത്തിയ സ്യൂട്ട്കേസിൽ നിന്ന് 223 ജീവനുള്ള വന്യമൃഗങ്ങളെയാണ് കസ്റ്റംസ് ഉദ്യോഗസ്ഥർ പിടികൂടിയത്. ദുബൈ വിമാനത്താവളത്തിന്റെ ചരിത്രത്തിലെ തന്നെ ഏറ്റവും അസാധാരണമായ വന്യജീവി വേട്ടയാണിത്.

സാധാരണ ബാഗേജുകൾ പോലെ തോന്നിച്ച സ്യൂട്ട്കേസ് സംശയത്തിന്റെ അടിസ്ഥാനത്തിൽ കൂടുതൽ സ്ക്രീനിംഗിനും പരിശോധനയ്ക്കും വിധേയമാക്കിയപ്പോഴാണ് അന്താരാഷ്ട്ര കള്ളക്കടത്ത് സംഘത്തിന്റെ നീക്കം പുറത്തായത്.

ബാഗ് തുറന്നപ്പോൾ കണ്ടത് പല്ലികളും പാമ്പുകളും തേളുകളും

വസ്ത്രങ്ങൾക്കും സാധനങ്ങൾക്കും പകരം ബാഗിനുള്ളിൽ അതിവിദഗ്ദ്ധമായി ഒളിപ്പിച്ച നിലയിലായിരുന്നു ജീവികൾ. 129 പല്ലികളെയും 50 തവളകളെയും 36 തേളുകളെയും 8 പാമ്പുകളെയും ബാ​ഗിൽ നിന്നും കണ്ടെടുത്തു. വംശനാശഭീഷണി നേരിടുന്ന ജീവജാലങ്ങളുടെ അന്താരാഷ്ട്ര വ്യാപാരം നിയന്ത്രിക്കുന്ന ആഗോള കരാറായ 'CITES' സംരക്ഷണ പട്ടികയിൽ ഉൾപ്പെട്ടവയാണ് ഇതിൽ ഭൂരിഭാഗം ജീവികളുമെന്ന് അധികൃതർ വ്യക്തമാക്കി.

തുടർനടപടികളുമായി ദുബൈ കസ്റ്റംസ്

പിടിച്ചെടുത്ത വന്യജീവികൾക്ക് ആവശ്യമായ അടിയന്തര പരിചരണവും വെറ്ററിനറി പരിശോധനകളും ഉറപ്പാക്കാൻ ദുബൈ കസ്റ്റംസ് യുഎഇ കാലാവസ്ഥാ വ്യതിയാന പരിസ്ഥിതി മന്ത്രാലയവുമായി ചേർന്ന് ഏകോപനം നടത്തിയിട്ടുണ്ട്. അന്താരാഷ്ട്ര തലത്തിൽ അതിർത്തി കടന്നുള്ള വന്യജീവി കടത്ത് തടയാൻ ദുബൈ കസ്റ്റംസ് അത്യാധുനിക സാങ്കേതികവിദ്യകളും റിസ്ക്-മാനേജ്മെന്റ് സംവിധാനങ്ങളുമാണ് ഉപയോഗിക്കുന്നത്.

"ഇന്നത്തെ കാലത്ത് അതിർത്തികൾ സംരക്ഷിക്കുക എന്നത് കേവലം നിരോധിത വസ്തുക്കൾ പിടികൂടുന്നതിൽ മാത്രം ഒതുങ്ങുന്നില്ല. നിയമവിരുദ്ധമായ വന്യജീവി കടത്തിൽ നിന്ന് ജൈവവൈവിധ്യത്തെയും പരിസ്ഥിതി സുസ്ഥിരതയെയും സംരക്ഷിക്കുക എന്നതുകൂടിയാണ്. യുഎഇയുടെ അന്താരാഷ്ട്ര പരിസ്ഥിതി ബാധ്യതകളോടുള്ള ദുബൈ കസ്റ്റംസിന്റെ പ്രതിബദ്ധതയാണ് ഈ നടപടിയിലൂടെ വ്യക്തമാകുന്നത്." ദുബൈ കസ്റ്റംസിലെ പാസഞ്ചർ ഓപ്പറേഷൻസ് ഡയറക്ടറായ ഖാലിദ് അഹമ്മദ് പറഞ്ഞു.

ആഗോള യാത്രാ-ലോജിസ്റ്റിക് ഹബ്ബ് എന്ന നിലയിലുള്ള ദുബൈയുടെ തന്ത്രപ്രധാനമായ സ്ഥാനം ദുരുപയോഗം ചെയ്യാൻ ശ്രമിക്കുന്ന കള്ളക്കടത്ത് സംഘങ്ങൾക്കെതിരെ പരിശോധനകളും നിരീക്ഷണങ്ങളും ഇനിയും ശക്തമാക്കുമെന്ന് കസ്റ്റംസ് അധികൃതർ മുന്നറിയിപ്പ് നൽകി.

ALSO READ: ദുബൈയിലെ റിയൽ എസ്റ്റേറ്റ് വിപണിയിൽ വൻ കുതിച്ചുചാട്ടം; പ്രോപ്പർട്ടികളുടെ മൂല്യം ഇരട്ടിയായി വർദ്ധിച്ചതായി റിപ്പോർട്ട്

Customs officials at Dubai International Airport were shocked after opening an abandoned suitcase containing hundreds of live wild animals. The discovery has highlighted ongoing efforts to combat wildlife trafficking through UAE airports.