ദുബൈ: യുഎസ്-ഇറാൻ സംഘർഷങ്ങളുടെ പശ്ചാത്തലത്തിലും ദുബൈയിലെ വ്യോമയാന മേഖലയുടെ ദീർഘകാല വികസന പദ്ധതികളിൽ യാതൊരുവിധ മാറ്റവുമുണ്ടാകില്ലെന്ന് ദുബൈ എയർപോർട്ട്‌സ് സിഇഒ പോൾ ഗ്രിഫിത്ത്‌സ്. ഇമാറാത്തിലെ അതിബൃഹത്തായ അൽ മക്തൂം അന്താരാഷ്ട്ര വിമാനത്താവളത്തിന്റെ ഒന്നാം ഘട്ട വികസന പ്രവർത്തനങ്ങൾ നിശ്ചയിച്ച സമയപരിധിക്കുള്ളിൽ തന്നെ പൂർത്തിയാക്കുമെന്നും വിമാനത്താവളത്തിന്റെ ഭാവി കാഴ്ചപ്പാട് ശക്തമായ പാതയിലാണെന്നും അദ്ദേഹം അറിയിച്ചു.

മേഖലയിലെ യുഎസ്-ഇസ്റാഈൽ-ഇറാൻ വെടിനിർത്തൽ നിലവിൽ പ്രാബല്യത്തിൽ വന്നിട്ടുണ്ടെങ്കിലും, കഴിഞ്ഞ കുറച്ചാഴ്ചകളായി നിലനിന്നിരുന്ന ഭൗമരാഷ്ട്രീയ സാഹചര്യങ്ങൾ ദുബൈയിലെ പദ്ധതികളെ സ്വാധീനിച്ചിട്ടുണ്ടോ എന്ന ചോദ്യങ്ങൾക്കുള്ള മറുപടിയായാണ് അദ്ദേഹം ലിങ്ക്ഡ്ഇൻ പോസ്റ്റിലൂടെ നിലപാട് വ്യക്തമാക്കിയത്.

പദ്ധതികൾ മാറ്റമില്ലാതെ മുന്നോട്ട്; ദുബൈ എപ്പോഴും ഇങ്ങനെയാണ്

സമീപകാല സംഭവവികാസങ്ങൾ ദുബായിന്റെ വ്യോമയാന പദ്ധതികളിൽ മാറ്റം വരുത്തിയിട്ടുണ്ടോ എന്ന ചോദ്യത്തിന് 'ഇല്ല' എന്നായിരുന്നു അദ്ദേഹത്തിന്റെ ലളിതമായ ഉത്തരം.

"എന്റെ ഔദ്യോഗിക ജീവിതത്തിലുടനീളം ഇത്തരം അനിശ്ചിതത്വത്തിന്റെ നിമിഷങ്ങൾ വന്നുപോകുന്നത് ഞാൻ കണ്ടിട്ടുണ്ട്. ഇത്തരം സാഹചര്യങ്ങളിൽ പതറാതെ നിക്ഷേപം തുടരാനും, കെട്ടിപ്പടുക്കാനും, ദീർഘവീക്ഷണത്തോടെ മുന്നോട്ട് നോക്കാനുമുള്ള ആത്മവിശ്വാസം നിലനിർത്തുക എന്നതാണ് പ്രധാനം. ദുബൈ എപ്പോഴും ചെയ്തിട്ടുള്ളത് അതാണ്, ഞങ്ങൾ അത് തുടർന്നും ചെയ്യും." പോൾ ഗ്രിഫിത്ത്‌സ് വ്യക്തമാക്കി.

ദുബൈയിലെ വ്യോമയാന മേഖലയുടെ ഭാവിയിലുള്ള തന്റെ ആത്മവിശ്വാസം എക്കാലത്തെയും പോലെ ശക്തമായി തുടരുകയാണെന്നും അദ്ദേഹം കൂട്ടിച്ചേർത്തു.

2032 ഓടെ ഒന്നാം ഘട്ടം പൂർത്തിയാകും

ദുബൈ എയർപോർട്ട്‌സിന്റെ മാസ്റ്റർ പ്ലാൻ അനുസരിച്ച്, 2013 മുതൽ അൽ മക്തൂം വിമാനത്താവളത്തിൽ പാസഞ്ചർ സർവീസുകൾ പ്രവർത്തിക്കുന്നുണ്ടെങ്കിലും, രണ്ടാം ഘട്ട വിപുലീകരണത്തോടെ പ്രതിവർഷം 150 ദശലക്ഷം യാത്രക്കാരെ ഉൾക്കൊള്ളാൻ ശേഷിയുള്ള ലോകത്തിലെ ഏറ്റവും വലിയ വിമാനത്താവളമായി ഇത് മാറും. പദ്ധതിയുടെ ഒന്നാം ഘട്ടം 2032 ഓടെ പൂർത്തിയാകും. ഒന്നാം ഘട്ടം പ്രവർത്തനക്ഷമമാകുന്നതോടെ നിലവിലെ ദുബൈ അന്താരാഷ്ട്ര വിമാനത്താവളത്തിൽ (DXB) നിന്നുള്ള എല്ലാ ഫ്ലൈറ്റ് സർവീസുകളും ഘട്ടഘട്ടമായി അൽ മക്തൂം വിമാനത്താവളത്തിലേക്ക് മാറ്റാൻ തുടങ്ങും.

മേഖലയിലെ താൽക്കാലിക പ്രതിസന്ധികൾ ദുബൈയിലെ ആഗോള വ്യോമയാന ഹബ്ബെന്ന പദവിയെയോ ദീർഘകാല നിക്ഷേപങ്ങളെയോ ബാധിക്കില്ലെന്ന ശക്തമായ സന്ദേശമാണ് വിമാനത്താവള മേധാവിയുടെ ഈ പ്രസ്താവനയിലൂടെ വ്യക്തമാകുന്നത്.

ALSO READ: ദുബൈയിലെ റിയൽ എസ്റ്റേറ്റ് വിപണിയിൽ വൻ കുതിച്ചുചാട്ടം; പ്രോപ്പർട്ടികളുടെ മൂല്യം ഇരട്ടിയായി വർദ്ധിച്ചതായി റിപ്പോർട്ട്

Dubai Airports CEO has reaffirmed that the expansion of Al Maktoum International Airport will be completed on schedule despite ongoing regional uncertainties. The mega project remains a key part of Dubai’s long-term aviation growth strategy.