തൃശൂർ: വാട്ടർ അതോറിറ്റിയുടെ ജലശുദ്ധീകരണശാലയിലുണ്ടായ ദാരുണ അപകടത്തിൽ പ്ലാന്റ് ഓപ്പറേറ്റർ മരിച്ചു. മേലൂർ സ്വദേശി ജോസഫ് (46) ആണ് മരിച്ചത്. തൃശൂർ കാടുകുറ്റി വൈന്തലയിൽ പ്രവർത്തിക്കുന്ന ജലശുദ്ധീകരണശാലയിൽ ഇന്നലെ രാത്രിയായിരുന്നു അപകടം സംഭവിച്ചത്. ജോലി സമയത്ത് കാൽതെറ്റി ക്ലാരിഫയറിലേക്ക് വീണതാകാം മരണകാരണമെന്നാണ് പ്രാഥമിക നിഗമനം.

രാത്രി ഡ്യൂട്ടിക്കിടെ സഹപ്രവർത്തകർ ഒന്നിച്ച് ഭക്ഷണം കഴിക്കാൻ ഇരുന്നപ്പോഴാണ് ജോസഫിന്റെ അസാന്നിധ്യം ശ്രദ്ധയിൽപ്പെടുന്നത്. തുടർന്ന് പ്ലാന്റിൽ നടത്തിയ തിരച്ചിലിലും കണ്ടെത്താനാകാതെ വന്നതോടെ ജീവനക്കാർ ഫയർഫോഴ്സിനെ വിവരമറിയിക്കുകയായിരുന്നു.

ഫയർഫോഴ്സ് സംഘം സ്ഥലത്തെത്തി നടത്തിയ വിശദമായ തെരച്ചിലിനൊടുവിലാണ് ക്ലാരിഫയറിനുള്ളിൽ ജോസഫിനെ മരിച്ച നിലയിൽ കണ്ടെത്തിയത്. മൃതദേഹം തുടർനടപടികൾക്കായി ആശുപത്രിയിലേക്ക് മാറ്റി. സംഭവത്തിൽ പൊലിസ് അന്വേഷണം ആരംഭിച്ചിട്ടുണ്ട്.

thrissur: a water authority employee tragically lost his life after accidentally falling into a clarifier tank at the local water treatment plant. emergency services rushed to the spot, but he could not be saved.