കൊല്‍ക്കത്ത: രാജ്യത്ത് വീണ്ടും ആള്‍ക്കൂട്ടക്കൊല റിപ്പോര്‍ട്ട് ചെയ്തിരിക്കുന്നു. പശ്ചിമബംഗാളിലാണ് സംഭവം. മലയാളിയാണ് കൊല്ലപ്പെട്ട യുവാവ്.  മോഷ്ടാവ് എന്നാരോപിച്ച് ആള്‍ക്കൂട്ടം കെട്ടിയിട്ട് മര്‍ദിക്കുകയായിരുന്നു. മരിച്ചയാളുടെ പേരുവിവരങ്ങള്‍ പുറത്തുവന്നിട്ടില്ല. കേസില്‍ അഞ്ച് പേരെ പൊലിസ് അറസ്റ്റ് ചെയ്യുകയും പ്രായപൂര്‍ത്തിയാവാത്ത രണ്ട് പേരെ കസ്റ്റഡിയിലെടുക്കുകയും ചെയ്തിട്ടുണ്ട്. 

സൗത്ത് 24 പര്‍ഗാനാസ് ജില്ലയിലെ കുല്‍ത്തലിയിലായിരുന്നു അതിക്രൂര സംഭവമുണ്ടായത്. കഴിഞ്ഞ ചൊവ്വാഴ്ച നടന്ന കൊലപാതകം ഞായറാഴ്ചയാണ് വാര്‍ത്തയായത്. 

ബംഗാളിലെത്തിയത് രണ്ടാഴ്ച മുന്‍പ്
കേരളത്തില്‍ ജോലിചെയ്യുന്ന സഹപ്രവര്‍ത്തകര്‍ക്കൊപ്പം രണ്ടാഴ്ച മുമ്പാണ് മുപ്പതുകാരനായ യുവാവ് കുല്‍ത്തലിയിലെത്തിയതെന്നാണ് പൊലിസ് പറയുന്നത്. ജൂണ്‍ ഒമ്പതിന് നടന്ന സംഭവം  ഏറെ വൈകിയാണ് പുറത്തറിയുന്നത്. ആക്രമണത്തിന്റെ വീഡിയോ സോഷ്യല്‍ മീഡിയയില്‍ വ്യാപകമായി പ്രചരിപ്പിച്ചിരുന്നു.

ALSO READ: ബംഗാളിൽ മോഷ്ടാവെന്ന് ആരോപിച്ച് മലയാളി യുവാവിനെ ആൾക്കൂട്ടം മർദിച്ച് കൊലപ്പെടുത്തി: പ്രായപൂർത്തിയാകാത്തവർ ഉൾപ്പെടെ ഏഴ് പേർ പിടിയിൽ

ക്രൂരത മോഷ്ടാവെന്ന് ആരോപിച്ച്
ജൂണ്‍ ഒമ്പതിന് രാവിലെ തനിച്ച് സന്‍കിജഹാന്‍ മേഖലയിലെ മാര്‍ക്കറ്റിലെത്തിയതായിരുന്നു ഇയാള്‍. എന്നാല്‍ വഴിതെറ്റി.  പ്രദേശത്ത് ചുറ്റിത്തിരിയുന്നത് കണ്ട നാട്ടുകാര്‍ ഇയാളെ ചോദ്യം ചെയ്തു. എന്നാല്‍ ബംഗാളി അറിയാതിരുന്ന യുവാവിന് അവരുടെ ചോദ്യങ്ങള്‍ക്ക് കൃത്യമായ ഉത്തരം നല്‍കാനോ കാര്യങ്ങള്‍ വിശദീകരിക്കാനോ കഴിഞ്ഞില്ല. ഇത് നാട്ടുകാരുടെ സംശയം ദൃഢമാക്കി. തിരിച്ചറിയല്‍ കാര്‍ഡ് കാണിക്കാന്‍ ആവശ്യപ്പെട്ടുവെന്നും റിപ്പോര്‍ട്ടുകള്‍ പറയുന്നു. 

അടികിട്ടി അവശനായ യുവാവിനെ ജോയ്നഗര്‍ -കുല്‍ത്തലി ആശുപത്രിയിലെത്തിച്ചെങ്കിലും രക്ഷിക്കാനായില്ല. മൃതദേഹം പോസ്റ്റുമോര്‍ട്ടത്തിന് അയച്ചിരിക്കുകയാണ്. ഇയാളുടെ കൂടെയുണ്ടായിരുന്നവരെ കണ്ടെത്താനുള്ള ശ്രമങ്ങളും പുരോഗമിക്കുകയാണെന്ന് പൊലിസ് അറിയിച്ചു. 

മൃതദേഹം പോസ്റ്റ്മോര്‍ട്ടത്തിന് അയച്ചിരിക്കുകയാണ്. സംഭവത്തിന്റെ എല്ലാ വശങ്ങളും അന്വേഷിക്കുന്നതായും പൊലിസ് വ്യക്തമാക്കിയിട്ടുണ്ട്. മരിച്ചയാള്‍ കേരളത്തില്‍ നിന്നുള്ളയാളാണെന്ന് ജില്ലാ പൊലിസ് സൂപ്രണ്ട് അര്‍ബിന്ദ് കുമാര്‍ ആനന്ദ് സ്ഥിരീകരിച്ചു.  വിഷയം അതീവ ഗൗരവത്തോടെയാണ് കാണുന്നതെന്ന് അദ്ദേഹം കൂട്ടിച്ചേര്‍ത്തു. പ്രതികള്‍ക്കെതിരെ ഒന്നിലധികം വകുപ്പുകള്‍ പ്രകാരം കേസുകള്‍ രജിസ്റ്റര്‍ ചെയ്തിട്ടുണ്ട്. 

a 30-year-old man from kerala was allegedly beaten to death by a mob in west bengal’s south 24 parganas district after being suspected of theft.