മോസ്‌കോ: റഷ്യയുടെ തലസ്ഥാനമായ മോസ്‌കോയിലെ എണ്ണ ശുദ്ധീകരണശാല ലക്ഷ്യമിട്ട് ഉക്രൈന്‍ ഡ്രോണ്‍ ആക്രമണം നടത്തി. ഈ ആഴ്ചയില്‍ രണ്ടാം തവണയാണ് റഷ്യക്കെതിരേ ഉക്രൈന്‍ ശക്തമായ ഡ്രോണ്‍ ആക്രമണം നടത്തുന്നത്.

റഷ്യന്‍ അധികൃതരുടെ വിവരങ്ങള്‍ പ്രകാരം വിവിധ മേഖലകളിലായി എത്തിയ ഉക്രൈന്‍ ഡ്രോണുകള്‍ വ്യോമപ്രതിരോധ സംവിധാനം വെടിവെച്ചിട്ടു. മോസ്‌കോയെ ലക്ഷ്യമിട്ട് ഏകദേശം 200 ഡ്രോണുകള്‍ എത്തിയതെന്നാണ് റിപ്പോര്‍ട്ടുകള്‍.

ALSO READ: യൂത്ത് കോണ്‍ഗ്രസ് പ്രവര്‍ത്തകര്‍ക്ക് നേരെയുണ്ടായ മര്‍ദ്ദനക്കേസ്; എഡിജിപി ഓഫീസില്‍ എസ്‌ഐടി പരിശോധന 

ആക്രമണത്തെ തുടര്‍ന്ന് മോസ്‌കോയിലെ പ്രധാന വിമാനത്താവളങ്ങളായ ഷെറെമെറ്റീവോ, ഡൊമോഡെഡോവോ, വ്‌നുക്കോവോ, ഷുക്കോവ്‌സ്‌കി എന്നിവിടങ്ങളില്‍ നിന്നുള്ള എല്ലാ വിമാന സര്‍വീസുകളും റഷ്യ താല്‍ക്കാലികമായി നിര്‍ത്തിവെച്ചു. സുരക്ഷാ കാരണങ്ങളാലാണ് നടപടി.

റഷ്യ അടുത്തിടെ കീവില്‍ നടത്തിയ വ്യോമാക്രമണങ്ങള്‍ക്കുള്ള 'അര്‍ഹമായ മറുപടി' എന്നാണ് ഉക്രൈന്‍ പ്രസിഡന്റ് വൊളോദിമിര്‍ സെലന്‍സ്‌കി ആക്രമണത്തെ വിശേഷിപ്പിച്ചത്. സാംസ്‌കാരിക കേന്ദ്രങ്ങള്‍ക്കും സാധാരണ ജനങ്ങള്‍ക്കും നേരെ റഷ്യ നടത്തുന്ന ആക്രമണങ്ങള്‍ക്കെതിരായ പ്രതിരോധ നടപടികളുടെ ഭാഗമാണ് ഈ നീക്കമെന്നും അദ്ദേഹം പറഞ്ഞു.

അതേസമയം, യുദ്ധം അവസാനിപ്പിക്കേണ്ട സമയമായെന്നും റഷ്യന്‍ പ്രസിഡന്റ് വ്‌ലാദിമിര്‍ പുതിന്‍ ചര്‍ച്ചകളിലേക്കും നയതന്ത്രപരമായ പരിഹാരങ്ങളിലേക്കും മടങ്ങിവരണമെന്നും സെലന്‍സ്‌കി ആഹ്വാനം ചെയ്തു.

ഈ ആഴ്ച ആദ്യം യുനെസ്‌കോ പൈതൃക പട്ടികയിലുള്ള കീവ്‌പെച്ചെര്‍സ്‌ക് ലാവ്ര സന്യാസി മഠ സമുച്ചയത്തിന് നേരെ റഷ്യ നടത്തിയ മിസൈല്‍ഡ്രോണ്‍ ആക്രമണത്തില്‍ 11 പേര്‍ കൊല്ലപ്പെട്ടിരുന്നു. അതിന് പിന്നാലെയാണ് മോസ്‌കോയെ ലക്ഷ്യമിട്ടുള്ള യുക്രെയ്‌നിന്റെ പുതിയ ആക്രമണം.

ആസിയാന്‍ രാജ്യങ്ങളിലെ നേതാക്കളെ സ്വീകരിക്കാന്‍ റഷ്യ ഒരുങ്ങുന്നതിനിടെയാണ് ആക്രമണം നടന്നത്. തായ്‌ലന്‍ഡ്, വിയറ്റ്‌നാം, സിംഗപ്പൂര്‍, മലേഷ്യ എന്നീ രാജ്യങ്ങളിലെ പ്രധാനമന്ത്രിമാരും ഫിലിപ്പീന്‍സ് പ്രസിഡന്റും ഉച്ചകോടിക്കായി റഷ്യയില്‍ എത്തിയിട്ടുണ്ട്. നാല് വര്‍ഷത്തോളമായി തുടരുന്ന യുദ്ധത്തിനിടെ സാമ്പത്തിക സ്ഥിരതയും അന്താരാഷ്ട്ര ബന്ധങ്ങളും മെച്ചപ്പെടുത്താന്‍ റഷ്യ ശ്രമിക്കുന്ന സാഹചര്യത്തിലാണ് ഈ ആക്രമണം ഉണ്ടായിരിക്കുന്നത്.

Ukraine launched a drone attack targeting an oil refinery in Moscow, Russia's capital. This is the second time this week that Ukraine has carried out a major drone attack against Russia