ആലപ്പുഴ: ചമ്പക്കുളം മൂലം വള്ളംകളിക്ക് അവധി കൊടുക്കില്ലെന്ന മുഖ്യമന്ത്രി വി.ഡി സതീശന്റെ പരാമര്‍ശത്തില്‍ കുട്ടനാട്ടില്‍ വ്യാപക പ്രതിഷേധം. ചമ്പക്കുളത്ത് മുഖ്യമന്ത്രിയുടെ കോലം കത്തിച്ചു. മൂലം ജലോത്സവം ഫാന്‍സ് ക്ലബ്ബിന്റെ നേതൃത്വത്തിലാണ് പ്രതിഷേധം സംഘടിപ്പിച്ചത്. 

കുട്ടനാടിനെ ആത്മാഭിമാനത്തെ ചോദ്യം ചെയ്ത വി.ഡി സതീശന്‍ മാപ്പ് പറയണമെന്ന പ്ലക്കാര്‍ഡ് ഉയര്‍ത്തിയായിരുന്നു പ്രതിഷേധം. തുടര്‍ന്ന് മുഖ്യമന്ത്രിയുടെ കോലം കത്തിക്കുകയും ചെയ്തു. 

തിങ്കളാഴ്ച്ചയാണ് വള്ളംകളി നടക്കുന്നത്. അന്നേ ദിവസം കുട്ടനാട്ടില്‍ പ്രാദേശിക അവധി നല്‍കണമെന്ന് കുട്ടനാട് എംഎല്‍എ റെജി ചെറിയാന്‍ നിയമസഭയില്‍ ആവശ്യപ്പെട്ടിരുന്നു. പരിഗണിക്കാമെന്ന് മറുപടി നല്‍കിയ മുഖ്യമന്ത്രി സീറ്റിലിരുന്ന ശേഷം ഒരു കാരണവശാലും അവധി കൊടുക്കില്ലെന്ന് പറഞ്ഞത് മൈക്കിലൂടെ പുറത്തുകേട്ടു. ഇതോടെ സംഭവം വിവാദമായി. മൈക്ക് ഓഫാണെന്ന് കരുതിയായിരുന്നു മുഖ്യമന്ത്രിയുടെ അടക്കം പറച്ചില്‍. 

സഭയില്‍ സംഭവിച്ചത് വീഡിയോ ദൃശ്യങ്ങളിലൂടെ പുറത്തുവന്നതോടെ വ്യാപക പ്രതിഷേധം ഉയരുകയാണ്.