ന്യൂയോര്‍ക്ക്: ഇറാന്‍ നയതന്ത്ര ഉദ്യോഗസ്ഥരുമായി കൂടിക്കാഴ്ച നടത്താനുള്ള ന്യൂയോര്‍ക്ക് സിറ്റി മേയര്‍ സൊഹ്‌റാന്‍ മംദാനിയുടെ പ്രതിനിധി സംഘത്തിന്റെ ശ്രമം അമേരിക്കന്‍ ഭരണകൂടം ഇടപെട്ട് തടഞ്ഞു. മേയറുടെ ഇന്റര്‍നാഷണല്‍ അഫയേഴ്‌സ് മേധാവിയായ അന മരിയ അര്‍ച്ചിലയുടെ നേതൃത്വത്തില്‍ നിശ്ചയിച്ചിരുന്ന ചര്‍ച്ചയാണ് യുഎസ് സ്റ്റേറ്റ് ഡിപ്പാര്‍ട്ട്‌മെന്റ് റദ്ദാക്കിച്ചതെന്ന് സിറ്റി ജേണല്‍ റിപോര്‍ട്ട് ചെയ്യുന്നു.

ഐക്യരാഷ്ട്രസഭയിലെ ഇറാന്റെ സ്ഥിരം പ്രതിനിധി അമീര്‍ സയീദ് ഇര്‍വാനിയുമായി കഴിഞ്ഞ ചൊവ്വാഴ്ചയായിരുന്നു കൂടിക്കാഴ്ച തീരുമാനിച്ചിരുന്നത്. എന്നാല്‍ വിവരമറിഞ്ഞ യുഎസ് സ്റ്റേറ്റ് ഡിപാര്‍ട്ട്‌മെന്റ് ഉദ്യോഗസ്ഥര്‍ ന്യൂയോര്‍ക്ക് സിറ്റി അധികൃതരുമായി നേരിട്ട് ബന്ധപ്പെട്ട് ചര്‍ച്ചയില്‍ നിന്ന് പിന്മാറാന്‍ ആവശ്യപ്പെടുകയായിരുന്നു. ഈ ചര്‍ച്ചയെക്കുറിച്ച് മേയര്‍ മംദാനിയെ ആര്‍ച്ചില മുന്‍കൂട്ടി അറിയിച്ചിരുന്നില്ല എന്നും വിവരമുണ്ട്.

അതേസമയം, ലോകകപ്പ് ഫുട്‌ബോളില്‍ അര്‍ജന്റീനയോട് തോറ്റ് പുറത്തായ ഈജിപ്ഷ്യന്‍ ടീമിന് മേയര്‍ സൊഹ്‌റാന്‍ മംദാനി പരസ്യ പിന്തുണ പ്രഖ്യാപിച്ചു. റഫറിയിങിലെ ഗുരുതരമായ പിഴവുകള്‍ കാരണം ഈജിപ്തിന്റെ വിജയം കൊള്ളയടിക്കപ്പെടുകയായിരുന്നു എന്ന് അദ്ദേഹം തുറന്നടിച്ചു.

ഫ്രഞ്ച് റഫറി ഫ്രാങ്കോയിസ് ലറ്റക്‌സിയറുടെ തെറ്റായ തീരുമാനങ്ങള്‍ക്കെതിരെ ഈജിപ്ത് ഫുട്‌ബോള്‍ അസോസിയേഷന്‍ ഫിഫയെ സമീപിച്ചതിന് പിന്നാലെയാണ് അമേരിക്കയില്‍ നിന്ന് മേയര്‍ ടീമിന് ഐക്യദാര്‍ഢ്യം പ്രഖ്യാപിച്ചത്. ബുധനാഴ്ച നഗരത്തിലെ ബസ് സര്‍വീസുകള്‍ നവീകരിക്കുന്നതിനുള്ള 'നെക്സ്റ്റ് സ്റ്റോപ്പ്: ബെറ്റര്‍ ബസസ്, ഫാസ്റ്റര്‍ സര്‍വീസ്' എന്ന പദ്ധതി പ്രഖ്യാപിക്കുന്നതിനിടെയാണ് യാത്രാസമയം ലാഭിക്കുന്നതിനെക്കുറിച്ച് വ്യക്തമാക്കാന്‍ മേയര്‍ ലോകകപ്പിലെ റഫറിയിങ് വിവാദത്തെ ഉദാഹരണമായി ചൂണ്ടിക്കാണിച്ചത്.

The US State Department intervened to cancel a scheduled meeting between NYC Mayor Zohran Mamdani’s international affairs chief and Iran's UN envoy, while the Mayor separately drew attention for publicly backing the Egyptian football team over World Cup refereeing controversies.