തിരുവനന്തപുരം: പ്ലസ് വണ്‍ പ്രവേശനത്തിനായുള്ള സപ്ലിമെന്ററി അലോട്ട്‌മെന്റിന് വിദ്യാര്‍ത്ഥികള്‍ക്ക് ഇന്നുമുതല്‍ അപേക്ഷിക്കാം. പ്രധാന അലോട്ട്‌മെന്റുകളില്‍ സീറ്റ് ലഭിക്കാത്തവര്‍ക്കും ഇതുവരെ അപേക്ഷിക്കാന്‍ സാധിക്കാത്തവര്‍ക്കും ജൂലൈ 15 വൈകിട്ട് അഞ്ചുവരെ വെബ്‌സൈറ്റിലൂടെ (https://hscap.kerala.gov.in) അപേക്ഷ സമര്‍പ്പിക്കാം.

അപേക്ഷിക്കേണ്ടത് എങ്ങനെ?

ഇതുവരെ സീറ്റ് കിട്ടാത്തവര്‍- കാന്‍ഡിഡേറ്റ് ലോഗിനിലെ 'RENEW APPLICATION' ലിങ്കില്‍ കയറി നിലവിലെ ഒഴിവുകള്‍ക്കനുസരിച്ച് പുതിയ ഓപ്ഷനുകള്‍ നല്‍കി അപേക്ഷ പുതുക്കുക.

പുതുതായി അപേക്ഷിക്കുന്നവര്‍- വെബ്‌സൈറ്റില്‍ 'Create Candidate Login-SWS' വഴി പുതിയ ലോഗിന്‍ ഉണ്ടാക്കിയ ശേഷം 'APPLY ONLINE' വഴി അപേക്ഷിക്കണം.

പിഴവുകള്‍ തിരുത്തേണ്ടവര്‍: നേരത്തെ നല്‍കിയ വിവരങ്ങളില്‍ തെറ്റുണ്ടായതിനാല്‍ പ്രവേശനം നിഷേധിക്കപ്പെട്ടവര്‍ക്ക്, 'RENEW APPLICATION' വഴി തെറ്റുകള്‍ തിരുത്തി അപേക്ഷ പുതുക്കാം.

നേരത്തെ പ്രവേശനം നേടിയവര്‍ക്കും അലോട്ട്‌മെന്റ് ലഭിച്ചിട്ടും പ്രവേശനം എടുക്കാത്തവര്‍ക്കും ഈ ഘട്ടത്തില്‍ അപേക്ഷിക്കാന്‍ അനുവാദമില്ല. ഒഴിവുള്ള സ്‌കൂളുകളുടെയും കോമ്പിനേഷനുകളുടെയും വിവരങ്ങള്‍ വെബ്‌സൈറ്റില്‍ ലഭ്യമാണ്. മെറിറ്റ് സീറ്റുകള്‍ക്കൊപ്പം മോഡല്‍ റസിഡന്‍ഷ്യല്‍ സ്‌കൂളുകളിലേക്കും ഇപ്പോള്‍ അപേക്ഷിക്കാം.

Applications for the Kerala Plus One supplementary allotment have started today on the HSCAP portal, with the deadline set for July 15.