തിരുവനന്തപുരം: നവകേരള സദസ്സിനിടെ യൂത്ത് കോണ്‍ഗ്രസ് പ്രവര്‍ത്തകര്‍ക്ക് മര്‍ദനമേറ്റ സംഭവത്തില്‍ എഡിജിപി എം.ആര്‍ അജിത് കുമാറിനെതിരെ നിര്‍ണായക നീക്കം. പ്രത്യേക അന്വേഷണ സംഘം (SIT) സമര്‍പ്പിച്ച റിപോര്‍ട്ട് സംസ്ഥാന പൊലിസ് മേധാവി റവാഡാ ചന്ദ്രശേഖര്‍ ഇന്ന് ആഭ്യന്തര വകുപ്പിന് കൈമാറിയേക്കും. കേസ് അട്ടിമറിക്കാന്‍ ശ്രമിച്ചതില്‍ എഡിജിപിക്ക് നേരിട്ട് പങ്കുണ്ടെന്ന വിലയിരുത്തലിലാണ് ഡിജിപി. ഇതിന്റെ അടിസ്ഥാനത്തില്‍ അജിത് കുമാറിനെതിരെ കര്‍ശന നടപടിക്ക് പൊലിസ് മേധാവി ശുപാര്‍ശ ചെയ്‌തേക്കുമെന്നാണ് വിവരം.

ഉദ്യോഗസ്ഥരുടെ നിര്‍ണായക മൊഴികള്‍ രേഖപ്പെടുത്തിയ റിപോര്‍ട്ടാണ് എസ്‌ഐടി ഡിജിപിക്ക് നല്‍കിയിരിക്കുന്നത്. റിപോര്‍ട്ട് ആഭ്യന്തര വകുപ്പിന്റെ കൈകളില്‍ എത്തുന്നതോടെ എഡിജിപി ഉള്‍പ്പെടെയുള്ളവര്‍ക്കെതിരെ ഉടനടി നടപടിയുണ്ടാകുമെന്നാണ് സൂചന.

അന്വേഷണം അട്ടിമറിക്കാന്‍ കൂട്ടുനിന്ന എഡിജിപിയുടെ ഓഫിസിലെ രണ്ട് ജീവനക്കാരും നിരീക്ഷണത്തിലാണ്. ഇവരാണ് അന്വേഷണ ഉദ്യോഗസ്ഥരെ നേരിട്ട് വിളിച്ച് വരുത്തി കേസ് ഡയറിയില്‍ തിരുത്തലുകള്‍ വരുത്താന്‍ സമ്മര്‍ദം ചെലുത്തിയതെന്ന് കണ്ടെത്തിയിട്ടുണ്ട്. ഇവര്‍ക്കെതിരെയും ഡിജിപിയുടെ റിപോര്‍ട്ടില്‍ നടപടി ശുപാര്‍ശയുണ്ടാകും.

നേരത്തെ, മര്‍ദനത്തിന് നേതൃത്വം നല്‍കിയ ഗണ്‍മാന്‍ അനില്‍കുമാര്‍ ഉള്‍പ്പെടെയുള്ളവരെ പ്രത്യേക അന്വേഷണ സംഘം ചോദ്യം ചെയ്തിരുന്നു. മുന്‍ മുഖ്യമന്ത്രി പിണറായി വിജയനും മന്ത്രിമാരും സഞ്ചരിച്ച നവകേരള ബസ് ആലപ്പുഴ ജനറല്‍ ആശുപത്രിക്ക് സമീപമെത്തിയപ്പോഴായിരുന്നു സംഭവം. കരിങ്കൊടി കാണിച്ച യൂത്ത് കോണ്‍ഗ്രസ്, കെഎസ്‌യു പ്രവര്‍ത്തകരെ സുരക്ഷാ ഉദ്യോഗസ്ഥര്‍ ക്രൂരമായി മര്‍ദിച്ചതാണ് വിവാദങ്ങള്‍ക്ക് വഴിവെച്ചത്.

The SIT investigation report on the Navakerala 'Rescue Act' controversy is set to be submitted to the Home Department today, with strong indications of disciplinary action against ADGP MR Ajith Kumar.