കൊച്ചി: സോഷ്യല്‍ മീഡിയയിലൂടെ അശ്ലീല ദൃശ്യങ്ങള്‍ പ്രചരിപ്പിച്ച കേസില്‍ വിവാദ യൂട്യൂബര്‍ 'തൊപ്പി' എന്ന മുഹമ്മദ് നിഹാലിന് കനത്ത തിരിച്ചടി. നിഹാലിന്റെ യൂട്യൂബ് ചാനല്‍ അധികൃതര്‍ നീക്കം ചെയ്തു. ആലുവ റൂറല്‍ സൈബര്‍ പൊലിസ് നല്‍കിയ പ്രത്യേക റിപോര്‍ട്ടിന്റെ അടിസ്ഥാനത്തിലാണ് നടപടി. അഡ്വ. ശ്രീജിത്ത് പെരുമന നല്‍കിയ പരാതിയില്‍ ഡിജിപി റവാഡ ചന്ദ്രശേഖര്‍ ഉത്തരവിട്ട അന്വേഷണത്തിലാണ് ഇപ്പോള്‍ നിര്‍ണായക നീക്കമുണ്ടായിരിക്കുന്നത്.

അതേസമയം, നിഹാല്‍ സമര്‍പ്പിച്ച മുന്‍കൂര്‍ ജാമ്യാപേക്ഷയെ പൊലിസ് കോടതിയില്‍ ശക്തമായി എതിര്‍ത്തു. ലഹരിമരുന്ന് ഉപയോഗം, അശ്ലീല പ്രചാരണം, പോക്‌സോ, പ്രായപൂര്‍ത്തിയാകാത്ത കുട്ടികളെ ലൈംഗികമായി ചൂഷണം ചെയ്യല്‍ തുടങ്ങിയ അതീവ ഗുരുതരമായ ആരോപണങ്ങളാണ് നിഹാലിനും സുഹൃത്തുക്കള്‍ക്കുമെതിരെ ഉയര്‍ന്നിട്ടുള്ളത്. അതിനാല്‍ യാതൊരു കാരണവശാലും ജാമ്യം അനുവദിക്കരുതെന്ന് പൊലിസ് എറണാകുളം സെഷന്‍സ് കോടതിയെ അറിയിച്ചു.

തൊപ്പിയുടെ 'എംആര്‍സെഡ്' (MRZ) ഗ്യാങ്ങിലെ സുഹൃത്തുക്കളായിരുന്ന മമ്മു എന്ന മുഹമ്മദ്, ഷമീര്‍ എന്നിവര്‍ പരസ്പരം ഉന്നയിച്ച ഗുരുതര ആരോപണങ്ങളാണ് കേസില്‍ വഴിത്തിരിവായത്. നിഹാല്‍ നിരന്തരമായി എംഡിഎംഎ  ഉള്‍പ്പെടെയുള്ള ലഹരിമരുന്നുകള്‍ ഉപയോഗിക്കാറുണ്ടെന്നും പ്രായപൂര്‍ത്തിയാകാത്ത പെണ്‍കുട്ടികളെ പണം നല്‍കി ലൈംഗികമായി ചൂഷണം ചെയ്യാറുണ്ടെന്നും ഇവര്‍ വെളിപ്പെടുത്തിയിരുന്നു. തൊപ്പിയുടെ മുറിയില്‍ നിന്ന് കഞ്ചാവ് പാക്കറ്റ് കണ്ടെത്തുന്നതിന്റെ ദൃശ്യങ്ങളും ഇവര്‍ പുറത്തുവിട്ടിരുന്നു. ഈ വിവരങ്ങളെല്ലാം ഉള്‍പ്പെടുത്തിയാണ് പൊലിസ് കോടതിയില്‍ റിപോര്‍ട്ട് നല്‍കിയിരിക്കുന്നത്.

Following a strict report by the Aluva Cyber Police, controversial YouTuber 'Thoppi' alias Muhammad Nihal’s channel has been removed amid serious allegations including drug abuse and minor exploitation.