ഒഡീഷ: കുടുംബവഴക്കിനിടെ ഭാര്യ മൊബൈല്‍കൊണ്ട് തലയ്ക്കടിച്ചതില്‍ പരുക്കേറ്റ് ചികിത്സയിലായിരുന്ന ഭര്‍ത്താവ് മരിച്ചു. ബലാംഗിര്‍ ജില്ലയിലെ ഒരു കുടുംബത്തിലാണ് അപൂര്‍വവും ദാരുണവുമായ സംഭവം നടന്നത്.

ശനിയാഴ്ചയാണ് വീട്ടില്‍ ദമ്പതികള്‍ തമ്മില്‍ വാക്കുതര്‍ക്കമുണ്ടായത്. തര്‍ക്കം രൂക്ഷമായതോടെ ഭാര്യ കൈയിലുണ്ടായിരുന്ന മൊബൈല്‍ ഫോണ്‍ ഭര്‍ത്താവിന്റെ തലയിലേക്ക് എറിയുകയായിരുന്നുവെന്നാണ് പൊലിസ് പറയുന്നത്. ശക്തമായി തലയ്ക്ക് പരുക്കേറ്റ യുവാവിനെ ഉടന്‍ തന്നെ ബലാംഗിര്‍ ജില്ലാ ആസ്ഥാന ആശുപത്രിയില്‍ പ്രവേശിപ്പിച്ചു.

ചികിത്സയ്ക്ക് ശേഷം ആരോഗ്യനില മെച്ചപ്പെട്ടതായി ഡോക്ടര്‍മാര്‍ വിലയിരുത്തിയതിനെ തുടര്‍ന്ന് ആശുപത്രിയില്‍ നിന്ന് ഡിസ്ചാര്‍ജ് ചെയ്ത് വീട്ടിലേക്ക് മടക്കി അയച്ചു. എന്നാല്‍ വീട്ടിലെത്തി മണിക്കൂറുകള്‍ക്കകം യുവാവിന്റെ ആരോഗ്യനില വീണ്ടും ഗുരുതരമായി വഷളാവുകയായിരുന്നു. തുടര്‍ന്ന് വീണ്ടും ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

മരണകാരണം കൃത്യമായി കണ്ടെത്താന്‍ പോസ്റ്റ്‌മോര്‍ട്ടം റിപ്പോര്‍ട്ടിനായി കാത്തിരിക്കുകയാണെന്ന് പോലീസ് അറിയിച്ചു. മൊബൈല്‍ ഫോണിന്റെ ആഘാതം മൂലമാണോ മരണം സംഭവിച്ചത്, അല്ലെങ്കില്‍ മറ്റ് ആരോഗ്യസങ്കീര്‍ണതകളുണ്ടായിരുന്നോയെന്നതടക്കമുള്ള കാര്യങ്ങള്‍ അന്വേഷണത്തിന്റെ ഭാഗമാണ്.

സംഭവത്തില്‍ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.