ന്യൂഡല്‍ഹി: രാജ്യത്തിന്റെ ചെറുപ്പത്തിന്റെ നീതിക്കായുള്ള ആയിരങ്ങളുടെ പോരാട്ടത്തെ ഹൃദയത്തോട് ചേര്‍ക്കുകയാണ് ഇന്ത്യന്‍ ജനത. പലതരത്തിലാണ് രാജ്യം അവര്‍ക്ക് പിന്തുണ അറിയിച്ചത്. ഭക്ഷണം ഉള്‍പെടെ അവശ്യ സാധനങ്ങള്‍ അയച്ചു കൊണ്ടാണ് ചിലര്‍ തങ്ങളുടെ ഐക്യദാര്‍ഢ്യം അറിയിച്ചത്. 
ആയിരക്കണക്കിന് ഭക്ഷണപ്പൊതികളാണ് രാജ്യത്തിന്റെ നാനാഭാഗങ്ങളില്‍ നിന്നും ഓണ്‍ലൈനായി ഒഴുകിയെത്തിയത് . 'അഭിജീത് ദീപ്കെ, ജന്തര്‍ മന്ദര്‍, ന്യൂഡല്‍ഹി' എന്ന ഒറ്റ വിലാസത്തിലാണ് ഓണ്‍ലൈന്‍ ആപ്പുകള്‍ വഴി ഭക്ഷണങ്ങള്‍ ഇവിടെ വിതരണത്തിനെത്തിയത്. 

ഏതായാലും ജന്തര്‍മന്തറില്‍ നീറ്റ് പരീക്ഷാ ക്രമക്കേടുകള്‍ക്കെതിരെ പ്രതിഷേധിക്കുന്നവര്‍ക്കായി സഹായഹസ്തവുമായി എത്തിയ ഏവര്‍ക്കും ഹൃദയം നിറഞ്ഞ നന്ദിയുമായി എത്തിയിരിക്കുകയാണ് കോക്രോച്ച് ജനതാ പാര്‍ട്ടി. ആവശ്യത്തില്‍ അധികം ഭക്ഷണം ഇതിനോടകം എത്തിക്കഴിഞ്ഞെന്നും ഇനി ആരും ഇത് അയക്കരുതെന്നും സി.ജെ.പി സോഷ്യല്‍ മീഡിയ വഴി അഭ്യര്‍ഥിക്കുന്നു. 

'അതി മനോഹരമാണ് നമ്മുടെ രാജ്യവും ഇവിടുത്തെ മനുഷ്യരും. പ്രതിഷേധക്കാര്‍ക്കായി ഭക്ഷണം അയച്ചുതന്നതിന് എല്ലാവര്‍ക്കും വലിയ നന്ദി. നിങ്ങളുടെ ഈ സ്‌നേഹത്തിന് മുന്നില്‍ ഞങ്ങള്‍ വാക്കുകളില്ലാത്തവരാകുന്നു.

എന്നാല്‍ ഇന്നത്തേക്ക് ആവശ്യത്തിനുള്ളതിലും അധികം ഭക്ഷണം ഞങ്ങള്‍ക്ക് ലഭിച്ചുകഴിഞ്ഞു  ദയവായി ഇനി ആരും ഭക്ഷണം അയക്കരുത്!' സോഷ്യല്‍ മീഡിയ പോസ്റ്റില്‍ പറയുന്നു.

സാധനങ്ങള്‍ അമിതമായി എത്തിച്ചേര്‍ന്ന് അത് പാഴായിപ്പോകുന്നത് ഒഴിവാക്കാനാണ് ഈയൊരു അടിയന്തര അഭ്യര്‍ത്ഥനയെന്നും സി.ജെ.പി വ്യക്തമാക്കുന്നു. നിലവിലുള്ള ആവശ്യങ്ങളെല്ലാം പൂര്‍ണമായി നിറവേറ്റപ്പെട്ടിട്ടുണ്ടെന്നും, ഭാവിയില്‍ വീണ്ടും എന്തെങ്കിലും ആവശ്യങ്ങള്‍ വരുകയാണെങ്കില്‍ അത് അന്നേ ദിവസം തന്നെ അറിയിക്കുമെന്നും പോസ്റ്റില്‍ അറിയിക്കുന്നു. കോക്രോച്ച് ജനതാ പാര്‍ട്ടിയുടെ ഔദ്യോഗിക ഇന്‍സ്റ്റാഗ്രാം പേജിലൂടെയാണ് സി.ജെ.പി ഇക്കാര്യം അറിയിക്കുന്നത്.

കനത്ത പൊലിസ് നടപടികള്‍ക്കും ലാത്തിച്ചാര്‍ജിനും ശേഷം തകര്‍ത്തുകളഞ്ഞ സമരപ്പന്തലുകള്‍ വീണ്ടും ഉയര്‍ത്തി പ്രവര്‍ത്തകര്‍ ജന്തര്‍മന്തറില്‍ വീണ്ടും തിരിച്ചെത്തിയിരിക്കുകയാണ്. മഴയെയും വന്‍ പൊലിസ് സന്നാഹത്തെയും അവഗണിച്ചാണ് ആയിരക്കണക്കിന് ആളുകള്‍ചൊവ്വാഴ്ചയും ബുധനാഴ്ചയുമായി സമരവേദിയിലേക്ക് വീണ്ടും എത്തിയത്.

അതിനിടെ, 'സന്‍സദ് ചലോ' മാര്‍ച്ചിലുണ്ടായ സംഘര്‍ഷങ്ങളും വാഹനാക്രമണങ്ങളുമായി ബന്ധപ്പെട്ട് ഡല്‍ഹി പൊലിസ് ആറ് എഫ്.ഐ.ആറുകള്‍ രജിസ്റ്റര്‍ ചെയ്തിട്ടുണ്ട്. വലിയ തോതിലുള്ള അക്രമങ്ങളും പൊതുമുതല്‍ നശിപ്പിക്കലുമാണ് ഉണ്ടായെന്നാണ് പൊലിസ് ആരോപിക്കുന്നത്. ഇന്റര്‍നെറ്റ് വിച്ഛേദിച്ചുകൊണ്ടുള്ള കര്‍ശന സുരക്ഷയാണ് നിലവില്‍ ഡല്‍ഹിയില്‍ ഏര്‍പ്പെടുത്തിയിരിക്കുന്നത്.

the cjp thanked supporters across india for sending food to protesters at delhi's jantar mantar, saying enough supplies had arrived and urging people to stop sending more to avoid waste.