അസം:അസമിലെ പ്രളയത്തില്‍ കഴിഞ്ഞ 24 മണിക്കൂറിനുള്ളില്‍ നാലു കുട്ടികള്‍ ഉള്‍പ്പെടെ 10 പേര്‍ മരണപ്പെട്ടതായി റിപ്പോര്‍ട്ട്. ജോര്‍ഹട്ട്, ശിവസാഗര്‍ എന്നീ ജില്ലകളില്‍ മൂന്ന് പേരും, ചറൈഡിയോയില്‍ രണ്ടു പേരും, ധേമാജിയിലും കര്‍ബിയിലും ഓരോ പേരുമാണ് മരണപ്പെട്ടത്. 

സംസ്ഥാന ദുരന്ത നിവാരണ അതോറിറ്റിയുടെ കണക്കുപ്രകാരം സംസ്ഥാനത്ത് ഇതുവരെ പ്രളയത്തില്‍ 41 പേര്‍ക്കാണ് ജീവന്‍ നഷ്ടപ്പെട്ടത്. 

അതേസമയം, മൂന്ന് സ്ത്രീകളെയും മൂന്ന് പുരുഷന്മാരേയും കാണാതായിട്ടുണ്ട്. സംസ്ഥാനത്ത് പ്രളയം കാരണം 11 ജില്ലകളിലായി ഏകദേശം 6.53 ലക്ഷം പേരാണ് ദുരിതം അനുഭവിക്കുന്നത്. 40 റവന്യൂ ബ്ലോക്കുകളിലായി 11 ജില്ലകള്‍ ഇപ്പോഴും വെള്ളത്തിനടിയിലാണ്.

ALSO READ: സമരക്കാര്‍ക്ക് നേരെ പെല്ലറ്റ് ഗണ്ണും?;നിരവധി പേര്‍ക്ക് ഗുരുതര പരുക്ക്

നിര്‍ത്താതെയുള്ള മഴ കാരണം ബ്രഹ്മപുത്രയും പോഷകനദികളും പല സ്ഥലത്തും കവിഞ്ഞൊഴുകുന്നു.നാങ്‌ലമുരഘട്ടില്‍ റെക്കോര്‍ഡ് ഉയരത്തിലാണ് ഡിസാംഗ് പുഴ ഒഴുകുന്നത്. അപായ നിലയുടേയും മുകളിലാണ് ചെനിമാരിയിലെ ബുര്‍ഹി ദിഹിംഗ് പുഴയും, നുമാലിഗഡിലെ ധന്‍സിരിയും, ശ്രീഭൂമിയിലെ കുഷിയറ നദിയും ഒഴുകുന്നത്.

പ്രളയ ബാധിതരായ 3.13 ലക്ഷം പേരെയാണ് ജില്ലാ ഭരണകൂടം 487 ക്യാമ്പുകളിലായി താമസിപ്പിച്ചിട്ടുള്ളത്. ബുധനാഴ്ച ഇന്ത്യന്‍ ആര്‍മിയും, പൊലിസും NDRF,  DDRF, SDRF ഉം ചേര്‍ന്ന് 8409 ദുരിതബാധിതരെ രക്ഷപ്പെടുത്തി. ബുധനാഴച ഉണ്ടായ പ്രളയത്തില്‍ 53 റോഡുകള്‍ തകര്‍ന്നതായും നിരവധി നാശനഷ്ടങ്ങളുണ്ടായതായും റിപ്പോര്‍ട്ടുണ്ട്.