ദുബൈ: യുഎഇയിൽ ഈ ആഴ്ച കടുത്ത ചൂട് അനുഭവപ്പെടുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു. രാജ്യത്തിന്റെ ഉൾപ്രദേശങ്ങളിൽ താപനില 48 ഡിഗ്രി സെൽഷ്യസ് വരെ ഉയരുമെന്നാണ് പ്രവചനം. അതേസമയം കിഴക്കൻ മേഖലകളിൽ ഇന്ന് ഉച്ചയ്ക്ക് ശേഷം ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്നും അധികൃതർ വ്യക്തമാക്കി.

ഇന്ന് പൊതുവെ തെളിഞ്ഞതോ ഭാഗികമായി മേഘാവൃതമോ ആയ കാലാവസ്ഥയായിരിക്കും. കിഴക്കൻ മേഖലകളിൽ സംവഹന മേഘങ്ങൾ (Convective Clouds) രൂപപ്പെടാൻ സാധ്യതയുള്ളതിനാൽ ചിലയിടങ്ങളിൽ മഴ ലഭിച്ചേക്കും.

രാത്രിയോടെയും നാളെ പുലർച്ചെയോടെയും തീരപ്രദേശങ്ങളിലും ഉൾപ്രദേശങ്ങളിലുമായി ഈർപ്പം വർധിക്കുകയും മൂടൽമഞ്ഞിനോ നേരിയ മഞ്ഞുമൂടലിനോ സാധ്യതയുണ്ടെന്നും മുന്നറിയിപ്പിൽ പറയുന്നു. തെക്കുകിഴക്കൻ ദിശയിൽ നിന്ന് വടക്കുപടിഞ്ഞാറൻ ദിശയിലേക്കുള്ള നേരിയതോ മിതമായതോ ആയ കാറ്റ് മണിക്കൂറിൽ 40 കിലോമീറ്റർ വരെ വേഗത കൈവരിച്ചേക്കും. ചിലയിടങ്ങളിൽ പൊടിക്കാറ്റിനും സാധ്യതയുണ്ട്.

പ്രദേശങ്ങളിലെ താപനില ഇപ്രകാരമായിരിക്കും:

* ഉൾപ്രദേശങ്ങൾ: 43°C മുതൽ 48°C വരെ

* തീരപ്രദേശങ്ങളും ദ്വീപുകളും: 37°C മുതൽ 42°C വരെ

* മലനിരകൾ: 31°C മുതൽ 37°C വരെ

വെള്ളിയാഴ്ച വരെ സമാന കാലാവസ്ഥ തുടരുമെന്നും ദേശീയ കാലാവസ്ഥാ കേന്ദ്രം അറിയിച്ചു. കിഴക്കൻ, തെക്കൻ മേഖലകളിൽ ഉച്ചയ്ക്ക് ശേഷം മഴയ്ക്കുള്ള സാധ്യത നിലനിൽക്കും. ബുധനാഴ്ച മുതൽ താപനില ക്രമേണ ഉയരുമെന്നും കാറ്റിന്റെ വേഗം ചില സമയങ്ങളിൽ മണിക്കൂറിൽ 40 കിലോമീറ്റർ വരെ എത്താമെന്നും അറിയിപ്പിൽ പറയുന്നു. അറബിക്കടലിലും ഒമാൻ കടലിലും കടൽ പൊതുവെ ശാന്തമായിരിക്കുമെന്നാണ് പ്രവചനം.

English summary : The UAE will see fair to partly cloudy skies today, with a chance of convective cloud formation over eastern areas bringing afternoon rainfall, while temperatures are expected to reach as high as 48°C in inland parts of the country, the National Centre of Meteorology (NCM) said.