കോവളം: പാര്‍ക്കിങ് ഏര്യയിലെ ശുചിമുറി ഉപയോഗിക്കുന്നതിനെ ചൊല്ലിയുണ്ടായ സംഘര്‍ഷത്തില്‍ കുടുംബത്തോടൊപ്പം കോവളംസന്ദര്‍ശിക്കാനെത്തിയ യുവാവിന് പരുക്കേറ്റു.
തൃശൂര്‍ ചാലക്കുടി സ്വദേശി ജിനേഷ് (36) നാണ് പരുക്കേറ്റത്. ഇയാളെ മെഡിക്കല്‍ കോളേജാശുപത്രിയില്‍ പ്രവേശിപ്പിച്ചു.സംഭവവുമായി ബന്ധപെട്ടു സ്വകാര്യ ഹോട്ടലിലെ സെക്യൂരിറ്റി സൂപ്പര്‍വൈസറെ കോവളം പൊലിസ് അറസ്റ്റു ചെയ്തു.
ശനിയാഴ്ച വൈകിട്ട് 6.45നായിരുന്നു സംഭവം. പൊലിസ് പറയുന്നതിങ്ങനെ: സന്ധ്യയോടെ ബീച്ചിലെത്തിയ ജിനേഷും ഒപ്പമുള്ളവരും സമീപത്തെ സ്വകാര്യ ഹോട്ടലിന്റെ പാര്‍ക്കിങ് ഏര്യയിലെ ശുചിമുറി തുറന്ന് നല്‍കാന്‍ ആവശ്യപ്പെട്ടു. വൈകിട്ട് അഞ്ചരക്ക് ശുചിമുറി പൂട്ടിയതാണെന്നും ഇനി തുറക്കാനാവില്ലെന്നും സെക്യൂരിറ്റി ജീവനക്കാര്‍ അറിയച്ചതിനെ തുടര്‍ന്നുണ്ടായ വാക്കേറ്റമാണ് സംഘര്‍ഷത്തില്‍ കലാശിച്ചത്. ടോര്‍ച്ച് കൊണ്ടുള്ള അടിയേറ്റ് ജിനേഷിന്റെ കണ്ണിനും താടിയെല്ലിനും പരുക്കേറ്റു.
ഇയാളുടെ പരാതിയുടെ അടിസ്ഥാനത്തില്‍ ഹോട്ടലിലെ സെക്യൂരിറ്റി സൂപ്പര്‍വൈസര്‍ നാഗപ്പനെ നാഗപ്പനെ (46) നെ കോവളം പൊലിസ് അറസ്റ്റുചെയ്യുകയായിരുന്നു. കൂട്ടു പ്രതികളെ തിരിച്ചറിഞ്ഞിട്ടില്ലെന്നും ഇവര്‍ക്കായി അന്വേഷണം നടന്നുവരികയാണെന്നും കോവളം എസ്.ഐ അജയകുമാര്‍ പറഞ്ഞു.