കൊച്ചി: റോബോറേവ് ഇന്റര്‍നാഷണല്‍ സംഘടിപ്പിക്കുന്ന ആദ്യത്തെ റോബോട്ടിക്‌സ് മല്‍സരം നവംബര്‍ അഞ്ചിനും ആറിനും കൊച്ചി ചോയ്‌സ് സ്‌കൂളില്‍ നടക്കും. എട്ടു വയസ് മുതല്‍ മുകളിലേക്ക് മുതിര്‍ന്നവരുടെ വരെ ടീമുകള്‍ക്കായി നടത്തുന്ന രാജ്യാന്തര മല്‍സരത്തില്‍ ഒന്നോ അതിലധികമോ റോബോട്ടിക് ഇനങ്ങളില്‍ രൂപകല്‍പന ചെയ്യാനുള്ള അവരുടെ കഴിവാണ് പരിശോധിക്കുന്നത്.
വ്യത്യസ്തയിനം പ്രവര്‍ത്തനങ്ങളില്‍ ഏര്‍പ്പെടാനാകും വിധത്തില്‍ റോബോട്ടുകളെ ഡിസൈന്‍ ചെയ്ത് നിര്‍മിക്കുകയും പ്രോഗ്രാം ചെയ്യുകയും പരിശോധിക്കുകയും ചെയ്യുന്നതിനെപ്പറ്റി വിദ്യാര്‍ഥികളേയും അധ്യാപകരേയും പഠിപ്പിക്കുന്ന റോബോട്ടിക്‌സ് വിദ്യാഭ്യാസ പരിപാടിയാണ് റോബോറേവ്. കൊച്ചിയില്‍ നടക്കുന്ന ഉദ്ഘാടന പരിപാടിയില്‍ മൂന്നു സ്വതന്ത്ര റോബോട്ട് ചലഞ്ചുകളും ഒരു സംരംഭക ചലഞ്ചുമാണ് റോബോറേവ് ഇന്‍ഡ്യ നടത്തുന്നത്.
മൂന്നാം ക്ലാസുമുതല്‍ കോളജ് തലംവരെയുള്ള വിദ്യാര്‍ഥികള്‍ക്കും ഉദ്യോഗസ്ഥര്‍ക്കും പങ്കെടുക്കാം. രജിസ്റ്റര്‍ ചെയ്യുന്നതിന് www.roboraveindia.org, www.roborave.org എന്ന വെബ്‌സൈറ്റ് സന്ദര്‍ശിക്കുക.