കൊച്ചി :സ്വാശ്രയ മെഡിക്കല്‍ കോളജിലേക്കുള്ള പ്രവേശനത്തിനുള്ള തങ്ങളുടെ അപേക്ഷ തഴഞ്ഞു താഴ്ന്ന റാങ്കുള്ളവര്‍ക്ക് പ്രവേശനം നല്‍കാന്‍ നടപടിയെടുത്തെന്ന് ആരോപിച്ച് വിദ്യാര്‍ഥിനികള്‍ നല്‍കിയ ഹരജിയില്‍ ജയിംസ് കമ്മിറ്റിയോടും സ്വകാര്യ മെഡിക്കല്‍ കോളജ് മാനേജ്‌മെന്റുകളോടും ഹൈക്കോടതി വിശദീകരണം തേടി.
നോര്‍ത്ത് പറവൂര്‍ സ്വദേശിനികളായ സേതുലക്ഷ്മി എന്‍ പിയേഴ്‌സണ്‍, അങ്കിത എന്നിവര്‍ തൊടുപുഴ അല്‍ അസര്‍ മെഡിക്കല്‍ കോളജ്, കുത്തിയതോട് ശ്രീനാരായണ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ് എന്നീ കോളജുകള്‍ക്കെതിരേ നല്‍കിയ ഹരജിയില്‍ ഡിവിഷന്‍ ബെഞ്ചിന്റേതാണ് ഉത്തരവ്. ഹരജി വെള്ളിയാഴ്ച വീണ്ടും പരിഗണിക്കും.
ഹരജിക്കാരികള്‍ ദേശീയതലത്തില്‍ നടത്തിയ നീറ്റിലെ റാങ്കിന്റെ അടിസ്ഥാനത്തിലാണ് അപേക്ഷ നല്‍കിയതെങ്കിലും മതിയായ കാരണമില്ലാതെ അല്‍ അസര്‍ കോളജ് അപേക്ഷ നിരസിച്ചുവെന്ന് ഹരജിയില്‍ പറയുന്നു. അതേസമയം ശ്രീനാരായണ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സില്‍ തങ്ങളേക്കാള്‍ താഴ്ന്ന റാങ്കുള്ളവരാണ് ലിസ്റ്റില്‍ ഇടം നേടിയതെന്നും ഹരജിക്കാര്‍ ആരോപിക്കുന്നു.
ഹരജി പരിഗണിച്ച ഡിവിഷന്‍ ബെഞ്ച് രണ്ടു കോളജുകളുടെയും മാനേജ്‌മെന്റുകള്‍ക്ക് നോട്ടിസ് നല്‍കാനും നിര്‍ദേശിച്ചിട്ടുണ്ട്.