കോഴിക്കോട്: ഇന്ത്യന്‍ പ്രധാനമന്ത്രി നരേന്ദ്ര മോദിയെ ഗാന്ധിജിയോട് ഉപമിച്ച് സാഹിത്യകാരി പി വത്സല.
ബി.ജെ.പി ദേശീയ കൗണ്‍സിലിനായി കോഴിക്കോട്ടെത്തുന്ന മോദിക്കു സ്വീകരണം നല്‍കുന്നതിന്റെ ഭാഗമായി ഒരു ദിനപ്പത്രത്തില്‍ എഴുതിയ ലേഖനത്തിലാണ് വത്സല മോദിസ്തുതിയുമായി രംഗത്തുവന്നത്.
നരേന്ദ്രമോദി പ്രധാനമന്ത്രിയായി രാജ്യത്തിന്റെ ഭരണം ഏറ്റെടുക്കുമ്പോള്‍ പിന്തുടര്‍ന്നത് ഗാന്ധിജിയുടെ മാര്‍ഗമാണെന്നും മോദിക്ക് ശക്തമായ ദിശാബോധവും ജനാധിപത്യ ബോധവുമുണ്ടെന്നുമാണ് വത്സല പറയുന്നത്. മോദിയുടെ നേതൃത്വത്തില്‍ നടക്കുന്ന കാവിവല്‍ക്കരണത്തിനേയും വത്സല ന്യായീകരിക്കുന്നുണ്ട്.
പ്രതിപക്ഷ കക്ഷികള്‍ ആരോപിക്കുന്നതു പോലെ രാജ്യത്തിന്റെ കാവിവല്‍ക്കരണമല്ല അദ്ദേഹത്തിന്റെ ജീവിത ലക്ഷ്യം. കാവി സന്ന്യാസ വര്‍ണമല്ലെന്നും മണ്ണിന്റെ നിറം കൂടിയാണെന്ന് മോദി സ്ഥാപിക്കുന്നുവെന്നും വത്സല പറയുന്നുണ്ട്.