മാഡ്രിഡ്: സ്പാനിഷ് ലാ ലിഗയില്‍ വമ്പന്‍മാരായ ബാഴ്‌സലോണയ്ക്കും റയല്‍ മാഡ്രിഡിനും സ്വന്തം തട്ടകത്തില്‍ സമനില കുരുക്ക്. നിലവിലെ ചാംപ്യന്‍മാരായ ബാഴ്‌സയെ നൗ കാംപില്‍ അത്‌ലറ്റിക്കോ മാഡ്രിഡ് 1-1നു സമനിലയില്‍ പൂട്ടിയപ്പോള്‍ റയല്‍ മാഡ്രിഡിനെ സാന്റിയാഗോ ബെര്‍ണാബുവില്‍ വിയ്യാറലാണ് ഇതേ സ്‌കോറില്‍ ഒപ്പം പിടിച്ചത്.

തുടര്‍ച്ചയായ 17ാം വിജയമെന്ന ലാ ലിഗ റെക്കോര്‍ഡ് കൊതിച്ച റയല്‍ മാഡ്രിഡിനു നേട്ടത്തിലെത്താന്‍ സാധിച്ചില്ല. ഇതോടെ 16 തുടര്‍ വിജയങ്ങളുടെ പെരുമ അവര്‍ക്ക് ബാഴ്‌സയുമായി പങ്കിടാം. ആദ്യ പകുതി തീരുന്നതിനു തൊട്ടുമുന്‍പ് പെനാല്‍റ്റി ഗോളാക്കി ബ്രൂണോ സോറിയാനോ വിയ്യാറലിനെ മുന്നിലെത്തിച്ചു. രണ്ടാം പകുതി തുടങ്ങി 48ാം മിനുട്ടില്‍ സെര്‍ജിയോ റാമോസ് റയലിനെ ഒപ്പമെത്തിച്ചു. ജെയിംസ് റോഡ്രിഗസ് എടുത്ത കോര്‍ണര്‍ ഹെഡ്ഡറിലൂടെ റാമോസ് ഗോളാക്കുകയായിരുന്നു.
സൂപ്പര്‍ താരം ലയണല്‍ മെസ്സി പരുക്കേറ്റു പുറത്തായ കളിയിലെ ആദ്യ പകുതിയില്‍ റാക്കിറ്റിചിലൂടെ ബാഴ്‌സയാണ് മുന്നിലെത്തിയത്. ഇനിയെസ്റ്റ ബോക്‌സിലേക്ക് ഉയര്‍ത്തിക്കൊടുത്ത പന്ത് തലകൊണ്ട് ചെത്തിയിട്ടാണ് ക്രൊയേഷ്യന്‍ താരം വല കുലുക്കിയത്. 61ാം മിനുട്ടില്‍ എയ്ഞ്ചല്‍ കൊറേയിലൂടെ അത്‌ലറ്റിക്കോ സമനില ഗോള്‍ നേടി. പ്രതിരോധ പിഴവാണ് ഗോളില്‍ കലാശിച്ചത്.
13 പോയിന്റുമായി റയല്‍ മാഡ്രിഡ് ഒന്നാം സ്ഥാനത്ത്. 11 പോയിന്റുമായി സെവിയ്യയും 10 പോയിന്റുമായി ബാഴ്‌സലോണയും രണ്ടും മൂന്നും സ്ഥാനങ്ങളില്‍. അത്‌ലറ്റിക്കോ മാഡ്രിഡ് നാലാം സ്ഥാനത്ത്.