തിരുവനന്തപുരം: വാഹനപരിശോധനക്കിടെ എസ്.ഐ ഹാന്‍ഡിലില്‍ പിടിച്ചതിനെ തുടര്‍ന്ന്  നിയന്ത്രണംവിട്ട ബൈക്കില്‍ നിന്നു തെറിച്ചു വീണ്
പരുക്കേറ്റ  യുവാക്കളെ പൊലസ് വഴിയില്‍ ഉപേക്ഷിച്ച് പോയെന്ന പരാതിയില്‍  സംസ്ഥാന മനുഷ്യാവകാശ കമ്മിഷന്‍ കേസെടുത്തു.
പരുക്കേറ്റ യുവാവിന് വിദഗ്ധ ചികിത്സ നല്‍കിയില്ലെന്ന പരാതിയില്‍  തിരുവനന്തപുരം മെഡിക്കല്‍ കോളജിനെതിരെയും  അന്വേഷണം നടത്തും.
മനുഷ്യാവകാശ കമ്മിഷന്റെ അന്വേഷണ വിഭാഗത്തോട്  സംഭവത്തെ കുറിച്ച് അന്വേഷണം നടത്തി വിശദീകരണം സമര്‍പ്പിക്കാന്‍ ജുഡീഷ്യല്‍ അംഗം പി. മോഹനദാസ് ഉത്തരവിട്ടു.   അന്വേഷണ വിഭാഗത്തിലെ ഡി.വൈ.എസ്.പി, സി.വിനോദായിരിക്കും കേസ് അന്വേഷിക്കുക. അന്വേഷണ റിപ്പോര്‍ട്ട് ഒരു മാസത്തിനകം സമര്‍പ്പിക്കണം.  കേസ് ഒക്‌ടോബറില്‍  വീണ്ടും പരിഗണിക്കും.
മെഡിക്കല്‍ കോളജ് ആശുപത്രി ഐ.സി യുവില്‍ കഴിയുന്ന വെട്ടുകാട് നൗഫി മന്‍സിലില്‍ നൗഫിക്ക് ചികിത്സ നല്‍കുന്നില്ലെന്ന പരാതിയെ കുറിച്ച് തിരുവനന്തപുരം മെഡിക്കല്‍ കോളജ് സൂപ്രണ്ട് അടിയന്തിര വിശദീകരണം സമര്‍പ്പിക്കണം.  തലയ്ക്ക് പരുക്കേറ്റ് ഗുരുതരാവസ്ഥയിലുള്ള നൗഫിയെ ആശുപത്രിയില്‍ നിന്നും വിടുതല്‍ ചെയ്ത് അറസ്റ്റ് ചെയ്യാനാണ് പൊലസിന്റെ നീക്കമെന്ന് നൗഫിയുടെ അമ്മ ഷാഹിദ കമ്മിഷനില്‍ നേരിട്ട് മൊഴി നല്‍കി. മെഡിക്കല്‍ കോളജിനെതിരെ ഗുരുതര ആരോപണമാണ് ഷാഹിദ ഉന്നയിച്ചിരിക്കുന്നതെന്ന് കമ്മിഷന്‍ നിരീക്ഷിച്ചു.
ഈ മാസം 19ന് കോവളം വാഴമുട്ടത്തായിരുന്നു സംഭവം.  അപകടത്തില്‍ പരുക്കേറ്റ എസ്.ഐയും ബൈക്ക് യാത്രികരായ യുവാക്കളും ആശുപത്രിയിലാണ്. ഹെല്‍മറ്റ് ധരിക്കാത്ത യുവാവ് ഓടിച്ചിരുന്ന ബൈക്കിന്റെ ഹാന്‍ഡിലില്‍ എസ്.ഐ വലിച്ച് തള്ളിയിടുകയായിരുന്നെന്ന് പരാതിയില്‍ പറയുന്നു.  
പൊലിസുകാരെ രക്ഷിക്കാനുള്ള ശ്രമങ്ങളാണ് നടക്കുന്നതെന്നും തങ്ങള്‍ക്കെതിരെ തെറ്റായ പ്രചരണം നടത്തുകയാണെന്നും  ദൃക്‌സാക്ഷികളുടെ മൊഴി എടുക്കണമെന്നും പരാതിയില്‍ ആവശ്യപ്പെടുന്നു. നൗഫിയുടെ അമ്മ ഷാഹിദയും ഷിബുവിന്റെ അമ്മ ഇസബെല്ലും സമര്‍പ്പിച്ച പരാതികളിലാണ് നടപടി.