കാടാമ്പുഴ: മരവട്ടം-മൈലാടി റോഡില്‍ റോഡിനു കുറുകെ അജ്ഞാതര്‍ മാലിന്യം തള്ളി. ദുര്‍ഗന്ധം മൂലം നാട്ടുകാരും യാത്രക്കാരും  ദുരിതത്തിലായി. മൈലാടി മാലിന്യ പ്ലാന്റിനു സമീപത്തു നിന്നും 150 മീറ്ററോളം ദൂരെ മരവട്ടം ഭാഗത്താണ് ഒരു ലോഡോളം വരുന്ന ജീര്‍ണിച്ച അറവു മാലിന്യങ്ങള്‍ തള്ളിയത്. വിവരമറിഞ്ഞ ഉടനെ കോട്ടക്കലില്‍ പൊലിസും മുനിസിപ്പല്‍ ചെയര്‍മാന്‍ കെ.കെ നാസര്‍, മുനിസിപ്പല്‍ ആരോഗ്യ സ്റ്റാന്റിങ് കമ്മിറ്റി ചെയര്‍മാന്‍ തൈക്കാട്ട് അലവി, കൗണ്‍സിലര്‍ ആയിശ, മുന്‍ കൗണ്‍സിലര്‍ പി.പി ഉമ്മര്‍ എന്നിവരും സ്ഥലത്തെത്തി റോഡില്‍ നിന്നും ജെ.സി.ബി ഉപയോഗിച്ചു മറ്റൊരു സ്ഥലത്തേക്കു മാലിന്യങ്ങള്‍ മാറ്റി കുഴിച്ചു മൂടി.
ഈ സ്ഥലത്തിനു അല്‍പം മാറി മറ്റൊരു ചെങ്കല്‍ ക്വാറിയില്‍ മാസങ്ങള്‍ക്കു മുമ്പു രഹസ്യമായി അറവു മാലിന്യം തള്ളാനെത്തിയവരെയും വാഹനവും മറ്റും  നാട്ടുകാര്‍  തടഞ്ഞു വെക്കുകയും പൊലിസിലേല്‍പിക്കുകയും ചെയ്തിരുന്നു. തള്ളാനെത്തിയവരെയും വാഹനത്തേയു പൊലിസ് കസ്റ്റഡിയിലെടുക്കുകയും കേസെടുക്കുകയും ചെയ്തു.
ഒരു ടിപ്പര്‍ ലോറിയോളം വരുന്ന അറവു മാലിന്യങ്ങളാണ് കഴിഞ്ഞ ദിവസം റോഡില്‍ തള്ളിയത്. ശനിയാഴ്ച അര്‍ധരാത്രിയാണു സംഭവം.