ചേര്‍ത്തല: മികച്ച നാഷണല്‍ സര്‍വീസ് സ്‌കീം യൂണിറ്റിനുള്ള സംസ്ഥാന സര്‍ക്കാര്‍ അവാര്‍ഡ് ചേര്‍ത്തല സെന്റ് മൈക്കിള്‍സ് കോളേജ് സ്വന്തമാക്കി. അധ്വാനമഹത്വവും കാര്‍ഷിക മേഖലയുടെ പ്രാധാന്യവും പുതുതലമുറയ്ക്ക് പകര്‍ന്ന ജൈവ പച്ചക്കറികൃഷി ഉള്‍പ്പെടെ സാമൂഹ്യ പ്രതിബദ്ധത അടിസ്ഥാനമാക്കി നടപ്പാക്കിയ വൈവിധ്യമാര്‍ന്ന പദ്ധതികളാണ് ഇവര്‍ക്ക് പുരസ്‌കാരം നേടിക്കൊടുത്തത്.
തൃശൂര്‍ ടൂണ്‍ഹാളിലെ ചടങ്ങില്‍ വിദ്യാഭ്യാസമന്ത്രി പ്രൊഫ. സി രവീന്ദ്രനാഥില്‍നിന്ന് കോളേജ് അധികാരികളും എന്‍എസ്എസ് പ്രവര്‍ത്തകരും ചേര്‍ന്ന് പുരസ്‌കാരം ഏറ്റുവാങ്ങി. കൃഷിമന്ത്രി വി എസ് സുനില്‍കുമാര്‍ അധ്യക്ഷനായി. കോളേജ് മാനേജര്‍ ഫാ. സോളമന്‍ ചാരങ്കാട്ട്, പ്രിന്‍സിപ്പല്‍ ഡോ. വി മാത്യു, എന്‍എസ്എസ് പ്രോഗ്രാം ഓഫീസര്‍മാരായ പ്രൊഫ. പി പ്രതീഷ്, പ്രൊഫ. ജോസഫ് ലിബിന്‍ തുടങ്ങിയവര്‍ ചേര്‍ന്നാണ് ഏറ്റുവാങ്ങിയത്. മികച്ച പ്രോഗ്രാം ഓഫീസര്‍ക്കുള്ള അവാര്‍ഡ് സെന്റ് മൈക്കിള്‍സിലെ പ്രൊഫ. പി പ്രതീഷ് ഏറ്റുവാങ്ങി. കേരള സര്‍വകലാശാലയിലെ മികച്ച എന്‍എസ്എസ് യൂണിറ്റിനുള്ള പുരസ്‌കാരം സ്പീക്കര്‍ പി ശ്രീരാമകൃഷ്ണന്‍ നേരത്തെ തിരുവനന്തപുരത്ത് സെനറ്റ്ഹാളിലെ ചടങ്ങില്‍ ഇവര്‍ ഏറ്റുവാങ്ങി.
മികച്ച എന്‍എസ്എസ് വളണ്ടിയര്‍ക്കുള്ള പുരസ്‌കാരം അഖില്‍ വിശ്വംഭരന് സമ്മാനിച്ചു.കോളേജ് കാമ്പസിലെ അഞ്ചേക്കറില്‍ എന്‍എസ്എസ് യൂണിറ്റ് നേതൃത്വത്തില്‍ ജൈവകൃഷി സാധ്യമാക്കിയതാണ് മികവന്റെ പാതയില്‍ ഏറ്റവും ശ്രദ്ധേയമായത്. പച്ചക്കറി, പഴവര്‍ഗം, പൂക്കള്‍, നെല്ല് എന്നിവയാണ് മാതൃകാപരമായി ഇവര്‍ കൃഷിചെയ്തത്. കൂടാതെ മത്സ്യകൃഷിയും സാധ്യമാക്കി. 500 ടണ്‍ ജൈവകൃഷി ഉല്‍പന്നങ്ങളാണ് ഇവര്‍ വിപണിയിലെത്തിച്ചത്. കാര്‍ഷികവൃത്തിയിലേക്ക് വിദ്യാര്‍ഥിസമൂഹത്തെ ആകര്‍ഷിക്കാന്‍ പോന്നതായി കാമ്പിസിലൊരുക്കിയ തോട്ടങ്ങള്‍. ആഫ്രിക്കന്‍ ഒച്ച് നിര്‍മാര്‍ജന പദ്ധതിയും കുളങ്ങള്‍, കിണറുകള്‍, പൊതുസ്ഥലങ്ങള്‍, റോഡുകള്‍ തുടങ്ങിയയിടങ്ങളില്‍ നടത്തിയ ശുചീകരണ പ്രവര്‍ത്തനവും ശ്രദ്ധയമായി.
കോളേജിലും പങ്കാളിത്ത ഗ്രാമമായ ചേര്‍ത്തല തെക്ക് പഞ്ചായത്തിലും പൊതുജനങ്ങളുമായി കൈകോര്‍ത്താണ് പദ്ധതികള്‍ നടപ്പാക്കിയത്. അവയവദാനം, രക്തദാനം, ആരോഗ്യസുരക്ഷ, കംപ്യൂട്ടര്‍ സാക്ഷരത, ചികിത്സാസഹായം, രോഗനിര്‍ണയം, പകര്‍ച്ചവ്യാധി പ്രതിരോധം, സാന്ത്വനപരിചരണം, റോഡ് സുരക്ഷ, പരിസ്ഥിതി സംരക്ഷണം, ഊര്‍ജസംരക്ഷണം, തൊഴില്‍ പരിശീലനം, നിര്‍ധന വിദ്യാര്‍ഥികള്‍ക്ക് വീട് നിര്‍മാണം തുടങ്ങിയവയും എന്‍എസ്എസ് യൂണിറ്റിന് സംസ്ഥാനതല പുരസ്‌കാരം നേടിക്കൊടുക്കുന്നതിലെ ഘടകമായി.