യുണൈറ്റഡ് നാഷന്‍സ്: ഇന്ത്യ -പാകിസ്താന്‍ തര്‍ക്കം പരിഹരിക്കാന്‍ മധ്യസ്ഥതതയ്ക്ക്് തയ്യാറാണെന്ന് യു.എന്‍ സെക്രട്ടറി ജനറല്‍ ബാന്‍ കി മൂണ്‍. തര്‍ക്കം പരിഹരിക്കാന്‍ ഇരു രാജ്യങ്ങളും അടിയന്തിരമായി നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.

പുതിയ സംഭവവികാസങ്ങളുടെ പശ്ചാത്തലത്തില്‍ ഇരു രാജ്യങ്ങള്‍ക്കുമിടയില്‍ വളര്‍ന്നു വരുന്ന സംഘര്‍ഷാവസ്ഥയില്‍ അദ്ദേഹം ആശങ്ക രേഖപ്പെടുത്തി. ഉറി ആക്രമണവും നിയന്ത്രണ രേഖയിലെ വെടിനിര്‍ത്തല്‍ കരാര്‍ ലംഘനവും ഏറെ ഉത്കണ്ഠയുണ്ടാക്കുന്നതാണ്.

ഇരു രാജ്യങ്ങളും കഴിയുന്നതും സംയമനം പാലിക്കാന്‍ ശ്രമിക്കണമെന്നും പ്രശ്‌നങ്ങളില്‍ പരിഹാരം കാണാന്‍ ശ്രമം നടത്തണമെന്നും അദ്ദേഹത്തിന്റെ പ്രസ്താവനയില്‍ പറയുന്നു.

കശ്മീര്‍ ഉള്‍പ്പെടെയുള്ള തര്‍ക്ക വിഷയങ്ങളില്‍ ഇരു രാജ്യങ്ങള്‍ക്കും സ്വീകാര്യമാണെങ്കില്‍ സമാധാനപരമായ ചര്‍ച്ചകളിലൂടെ പരിഹരിക്കാനുള്ള ശ്രമങ്ങള്‍ക്ക് മധ്യസ്ഥതക്ക് സെക്രട്ടറി ജനറല്‍ തയ്യാറാണെന്നും ബാന്‍ കി മൂണ്‍ വാര്‍ത്താകുറിപ്പില്‍ വ്യക്തമാക്കി.