തുറവൂര്‍: ദിനംപ്രതി തുറവൂറിലും സമീപ പ്രദേശങ്ങളിലും മോഷണങ്ങള്‍ വര്‍ധിക്കുന്നു.
ശനിയാഴ്ച രാത്രി തുറവൂര്‍ മാസ്റ്റേഴ്‌സ് കോളേജില്‍ മോഷ്ടാക്കള്‍ കയറി ഡസ്‌ക്കുകകളും മേശകളും തീവെച്ച് നശിപ്പിച്ചു. അലമാരിയിലുണ്ടായിരുന്ന ഏഴ് സ്മാര്‍ട്ട് ഫോണുകള്‍ അപഹരിച്ചു. ഓഫീസില്‍ പണമൊന്നും സൂക്ഷിക്കാതിരുന്നത് ഭാഗ്യമായി.
 കഴിഞ്ഞ വര്‍ഷവും ഇവിടെ നിന്നും മുപ്പതിനായിരം രൂപ അപഹരിച്ചിരുന്നു.മാസ്റ്റേഴ്‌സ് കോളേജിന്റെ കിഴക്കുഭാഗത്തുള്ള തുറവൂര്‍ എസ്.എന്‍.ഡി.പി.ശാഖയോഗത്തിന്റെ ഓഫീസിന്റെ പൂട്ട് തകര്‍ത്ത് കയറി. ഇവിടെ റിക്കാര്‍ഡുകളും ബുക്കുകളുമെല്ലാം വാരിവലിച്ചിട്ടിരുന്നു. പണമൊന്നും ഇവിടെയും ഇല്ലായിരുന്നു. കുത്തിയതോട് പൊലിസ് സ്ഥലത്തെത്തി കേസ് അന്വേഷണം ആരംഭിച്ചു.
തുറവൂറിലും സമീപ പ്രദേശങ്ങളിലുമായി രണ്ട് മാസത്തോളമായി ധാരാളം മോഷണങ്ങള്‍ നടന്നിരുന്നു. സ്ത്രീകളും കുട്ടികളും ഉള്‍പ്പെടെയുള്ളവര്‍ ഭീതിയിലാണ് കഴിയുന്നത്. ജനങ്ങളുടെ സുരക്ഷിതത്വം ഉറപ്പാക്കാന്‍ പൊലിസ് രാത്രി കാലപരിശോധന ഊര്‍ജിതമാക്കണമെന്ന ആവശ്യം ശക്തമായിട്ടുണ്ട്.