കാസര്‍കോട്: കേരള കേബിള്‍ ടി.വി ഓപ്പറേറ്റേഴ്‌സ് അസോസിയേഷന്‍ സംസ്ഥാന പ്രസിഡന്റ് കാസര്‍കോട് പുലിക്കുന്നിലെ നാസര്‍ ഹസ്സന്‍ അന്‍വര്‍ (52) അന്തരിച്ചു. അസുഖത്തെ തുടര്‍ന്ന് ഇന്ന് ഉച്ചയ്ക്ക് 12.15 മണിയോടെ മംഗളൂരു എ.ജെ ആശുപത്രിയില്‍ വെച്ചായിരുന്നു അന്ത്യം. സംസ്‌കാരം നാളെ രാവിലെ 10 മണിക്ക് ചെമ്മനാട് ജുമാ മസ്ജിദ് ഖബര്‍സ്ഥാനില്‍ ഖബറടക്കും. സംസ്ഥാന തലത്തില്‍ കേബിള്‍ ടി.വി ഓപ്പര്‍റ്റര്‍മാരെ ഒന്നിപ്പിക്കുന്നതിനായി കെ.സി.സി.എല്‍ എന്ന കമ്പനി രൂപീകരിക്കുകയും കേരള വിഷന്‍ എന്ന പേരില്‍ ടെലിവിഷന്‍ ശൃംഖല തുടങ്ങുകയും ചെയ്തിരുന്നു. തൃശൂര്‍ കേന്ദ്രീകരിച്ചാണ് കെ.സി.സി.എല്‍ പ്രവര്‍ത്തിക്കുന്നത്. കേന്ദ്ര സര്‍ക്കാരിന്റെ നിര്‍ദേശത്തെ തുടര്‍ന്ന് കേരളത്തില്‍ കേബിള്‍ ടി.വി രംഗത്ത് സമ്പൂര്‍ണ ഡിജിറ്റലൈസേഷന്‍ കൊണ്ടുവന്നതും അന്‍വര്‍ ആയിരുന്നു. കാസര്‍കോട്ടെ പ്രാദേശിക ചാനലായ കെ.എസി.എന്‍ ചാനലിന്റെ എം.ഡിയായിരുന്നു. ചെമ്മനാട്ടെ പ്രമുഖ കുടുംബാംഗമായ പരേതനായ സി.പി മഹമൂദിന്റെയും എട്ടുംവളപ്പില്‍ അബ്ദുല്‍ ഖാദര്‍ ഹാജിയുടെ മകള്‍ പരേതയായ ആയിശയുടെയും മകനാണ്. ഭാര്യ: ആയിശ എന്ന ആശ. രണ്ടു മക്കളുണ്ട്.