ന്യൂഡല്‍ഹി: ജമ്മുകശ്മീരിലെ പ്രമുഖ ഇംഗ്ലീഷ് ദിനപത്രമായ കശ്മീര്‍ റീഡറിന്റെ പ്രസിദ്ധീകരണം നിരോധിച്ച സംസ്ഥാന സര്‍ക്കാരിന്റെ നടപടിയെ എഡിറ്റര്‍മാരുടെ സംഘടനയായ ഓള്‍ ഇന്ത്യാ എഡിറ്റേഴ്‌സ് കോണ്‍ഫറന്‍സ് (എ.ഐ.എന്‍.ഇ.സി) അപലപിച്ചു.
 മാധ്യമങ്ങള്‍ക്കെതിരായ സര്‍ക്കാരിന്റെ നടപടി അതീവഗൗരവമാണെന്ന് സംഘടനാ പ്രസിഡന്റ് വിശ്വബന്ദു ഗുപ്തി പ്രസ്താവനയില്‍ പറഞ്ഞു. പൂര്‍ണമാധ്യമ സ്വാതന്ത്ര്യം വേണമെന്നതാണ് സംഘടനയുടെ നിലപാട്. അതിനാല്‍ മാധ്യമ സ്വാതന്ത്ര്യം ഹനിക്കുന്ന നിലപാടിനെ അംഗീകരിക്കാനാവില്ലെന്നും അദ്ദേഹം കൂട്ടിച്ചേര്‍ത്തു.
സൈന്യത്തിനും സര്‍ക്കാരിനും എതിരേ പ്രകടനങ്ങള്‍ നടക്കുന്ന കശ്മീരില്‍ അക്രമത്തിന് പ്രേരിപ്പിക്കുന്നുവെന്ന് ആരോപിച്ചാണ് സംസ്ഥാന സര്‍ക്കാര്‍ പത്രം അടച്ചുപൂട്ടാന്‍ ഉത്തരവിട്ടത്.