വണ്ടൂര്‍: ബ്ലോക്ക് പഞ്ചായത്തിലെ സാമ്പത്തിക തട്ടിപ്പുമായി ബന്ധപെട്ട് വകുപ്പു തല അന്വേഷണത്തിനു ഗ്രാമ വികസന കമ്മീഷണറേറ്റിലെ ഉന്നത ഉദ്യോഗസ്ഥര്‍ വണ്ടൂരിലെത്തി. സീനിയര്‍ ഫൈനാന്‍സ് ഓഫീസര്‍ കെ.എസ് അജയകുമാറിന്റെ നേതൃത്വത്തിലെത്തിയ സംഘം ഓഫീസിലെ രേഖകള്‍ പരിശോധിച്ച് ജീവനക്കാരില്‍ നിന്നും മൊഴിയെടുത്തു.
സംഘത്തിന്റെ പരിശോധന ഇന്നും തുടരും. അന്വേഷണം പൂര്‍ത്തീകരിക്കുന്ന മുറക്ക് തന്നെ വീഴ്ച സംഭവിച്ച ജീവനക്കാര്‍ക്കെതിരെ നടപടിയുണ്ടാകുമെന്നാണ് കരുതുന്നത്. സംഭവത്തില്‍ സസ്‌പെന്‍ഷനിലുള്ള അലി ഹസന്‍ ജോലിയില്‍ പ്രവേശിച്ച 1999-2000 കാലഘട്ടം മുതലുള്ള ഫയലുകളാണ് സംഘം പരിശോധിക്കുന്നത്. അതു വരെയുള്ള മുഴുവന്‍ ബാങ്ക് രേഖകളും ലഭിക്കാന്‍ വേണ്ടി രണ്ട് ദേശ സാല്‍കൃത ബാങ്കുകള്‍ക്ക് അപേക്ഷ നല്‍കിയിട്ടുണ്ടെങ്കിലും ഇവര്‍ സമയം ആവശ്യപെട്ടിരിക്കുകയാണ്.
കേവലം ഓഫീസ് അറ്റന്‍ഡര്‍ മാത്രമായ ജീവനക്കാരനു ഇത്രയും വലിയ തുക തട്ടിയെടുക്കാന്‍ സാധിച്ചത് വകുപ്പിനു തന്നെ നാണക്കേടുണ്ടാക്കിയിട്ടുണ്ട്. ഇതിനുത്തരവാദികളായ മേലുദ്യോഗസ്ഥരടക്കമുള്ളവര്‍ക്കെതിരെയുള്ള നടപടികളും  ഇവരുടെ സന്ദര്‍ശനത്തിന്റെ ലക്ഷ്യമായി വിലയിരുത്തുന്നുണ്ട്.
കുറ്റക്കാര്‍ക്കെതിരെ കര്‍ശന നടപടി വേണം
വണ്ടൂര്‍: ബ്ലോക്ക് പഞ്ചായത്ത് ഓഫീസിലെ സാമ്പത്തിക തട്ടിപ്പിന്റെ നിജസ്ഥിതി പുറത്ത് കൊണ്ടുവന്ന് കുറ്റക്കാര്‍ക്കെതിരെ കര്‍ശന നടപടി സ്വീകരിക്കണമെന്ന് വണ്ടൂര്‍ മണ്ഡലം മുസ്‌ലിം യൂത്ത്‌ലീഗ് ഭാരവാഹികളുടെ യോഗം ആവശ്യപ്പെട്ടു. പ്രസിഡന്റ് ഷൈജല്‍ എടപ്പറ്റ അധ്യക്ഷനായി.
ജനറല്‍ സെക്രട്ടറി എം.ടി അലിനൗഷാദ്, കെ.ഫിര്‍ദൗസ്ഖാന്‍, അസ്‌കര്‍, ഡോ.ഫൈസല്‍ ബാബു, എം.എം ജാഫര്‍, എം.സല്‍മാന്‍ തുടങ്ങിയവര്‍ പങ്കെടുത്തു.