പരിയാരം: സ്വാശ്രയപ്രശ്‌നത്തില്‍ വലതു വിദ്യാര്‍ഥി സംഘടനകള്‍ പരിയാരം മെഡിക്കല്‍ കോളജിലേക്കു നടത്തിയ മാര്‍ച്ച് അക്രമാസക്തമായി. ഇന്നു രാവിലെ 11.45ഓടെ കെ.എസ്.യു, എം.എസ്.എഫ് നേതൃത്വത്തില്‍ നടത്തിയ മാര്‍ച്ചാണ് അക്രമാസക്തമായത്. നൂറോളം പ്രവര്‍ത്തകര്‍ പങ്കെടുത്ത മാര്‍ച്ച് മെഡിക്കല്‍ കോളജ് ഗേറ്റില്‍ പൊലിസ് ബാരിക്കേഡ് തീര്‍ത്ത് തടഞ്ഞിരുന്നു. എന്നാല്‍, ബാരിക്കേഡ് തകര്‍ത്ത് അകത്തേക്കു പ്രവേശിച്ച സമരക്കാര്‍ക്കു നേരേ പൊലിസ് ലാത്തിവീശി. തുടര്‍ന്നു പിരിച്ചുവിടാന്‍ ജലപീരങ്കിയും പ്രയോഗിച്ചു.

സമരക്കാര്‍ മെഡിക്കല്‍ കോളജ് ഗേറ്റിനു മുന്നില്‍ കുത്തിയിരുന്നു. എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂര്‍ സമരം ഉദ്ഘാടനം ചെയ്തു. തളിപ്പറമ്പ് ഡിവൈഎസ്പി അരവിന്ദാക്ഷന്റെ നേതൃത്വത്തില്‍ വന്‍ പൊലിസ് സുരക്ഷ ഒരുക്കിയിരുന്നു.