മലയിന്‍കീഴ്: ബി.എസ്.എന്‍.എല്‍ ജീവനക്കാരനെ ആക്രമിച്ച കേസില്‍ കാല്‍ നൂറ്റാണ്ടിനു ശേഷം പ്രതി പിടിയില്‍. മലയിന്‍കീഴ് മലയം ചരുവിള വീട്ടില്‍ ഡേവിഡ് ലാലി (54) ആണ് പിടിയിലായത്. നെടുമങ്ങാട് ഡിവൈ.എസ്.പിയുടെ നേത്യത്വത്തിലുള്ള സംഘം ഇന്നലെ പുലര്‍ച്ചെ കൊച്ചിയില്‍ നിന്നാണ് ഇയാളെ പിടികൂടിയത്.
1988ലായിരുന്നു കേസിനാസ്പദമായ സംഭവം. ബി.എസ്.എന്‍.എല്‍ താല്‍ക്കാലിക ജീവനക്കാരനായ ജോര്‍ജുകുട്ടി യോഹന്നാനെയാണ് ഇയാള്‍ ആക്രമിച്ചത്. 1990ല്‍ കോടതി ഡേവിഡ് ലാലിക്ക് രണ്ടു വര്‍ഷം കഠിന തടവും ആയിരം രൂപ പിഴയും ശിക്ഷ വിധിച്ചു. തുടര്‍ന്ന് ഒളിവില്‍പോയ ഡേവിഡ് ലാലി മൂന്ന് വര്‍ഷം മുമ്പ് കീഴടങ്ങാന്‍ കൂടുതല്‍ സമയം ആവശ്യപ്പെട്ട് സുപ്രീം കോടതിയെ സമീപിച്ചെങ്കിലും കോടതി അംഗീകരിച്ചില്ല. ഇതിനിടയില്‍ കഴിഞ്ഞ സര്‍ക്കാര്‍ ശിക്ഷ പിഴയിലൊതുക്കി ഉത്തരവിറക്കിയത് വിവാദമായിരുന്നു. സുപ്രീം കോടതി ഇടപെട്ട കേസിലെ പ്രതിയെ ഒരു ദിവസംപോലും ജയിലില്‍ അടയ്ക്കാതെ ശിക്ഷ റദ്ദാക്കിയ നടപടിക്കെതിരെ ഹൈക്കോടതിയില്‍ സമര്‍പ്പിച്ച ഹര്‍ജി പരിഗണിച്ച ജസ്റ്റീസ് കെമല്‍പാഷ സര്‍ക്കാര്‍ ഉത്തരവ് റദ്ദാക്കുകയായിരുന്നു. തുടര്‍ന്ന് നെയ്യാറ്റിന്‍കര ജുഡീഷ്യല്‍ ഒന്നാംക്ലാസ് കോടതി പ്രതിക്കെതിരെ ജാമ്യമില്ലാ വാറണ്ട് പുറപ്പെടുവിച്ചു.
വീണ്ടും ഒളിവില്‍പോയ പ്രതി കൊച്ചിയില്‍ ഒരു ഫ്‌ളാറ്റിലുണ്ടെന്ന് ജില്ലാ പൊലിസ് മേധാവി ഷെഫിന്‍ അഹമ്മദിന് രഹസ്യ വിവരം ലഭിച്ചതിനെത്തുടര്‍ന്ന് നെടുമങ്ങാട് ഡിവൈ.എസ്.പി ബിജുമോന്‍, സി.ഐ ജയകുമാര്‍ എന്നിവരുടെ നേതൃത്വത്തിലുള്ള സംഘം എത്തി അറസ്റ്റ് ചെയ്യുകയായിരുന്നു.
കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. വിദേശത്ത് കടക്കാനായിരുന്നു ഇയാള്‍ കൊച്ചിയില്‍ തങ്ങിയിരുന്നത്.