തലശ്ശേരി: നിയന്ത്രണം വിട്ട ലോറി കടയിലേക്ക് പാഞ്ഞുകയറി കടയുടെ മുന്‍ഭാഗം പൂര്‍ണമായും തകര്‍ന്നു. മില്‍മാ ബൂത്ത് ഉള്‍പ്പെടുന്ന കൊടുവള്ളിയിലെ ഇ സുരേന്ദ്രന്റെ കടയാണ് തകര്‍ന്നത്. സാധാരണ ദിവസങ്ങളില്‍ അര്‍ധരാത്രി വരെ പ്രവര്‍ത്തിക്കുന്ന കട ഇന്നലെ അവധിയായിരുന്നതിനാല്‍ ആളപായം ഒഴിവായി. കോഴിക്കോട് ഭാഗത്ത് നിന്നു നിറയെ ലോഡുമായി മംഗലാപുരത്തേക്ക് പോവുകയായിരുന്ന നാഷണല്‍ പെര്‍മിറ്റ് ലോറിയാണ് അപകടത്തില്‍പ്പെട്ടത്. റെയില്‍വേ ഗേറ്റു കടന്ന് പിണറായി ഭാഗത്തുള്ള കയറ്റം കയറാന്‍ ശ്രമിക്കവേ ലോറി പിറകോട്ട് വരികയായിരുന്നു. പിന്നോട്ടു വന്ന ലോറി റെയില്‍വേ ഗേറ്റിനടുത്ത കൂറ്റന്‍ മരത്തിനിടിച്ചാണ് നിന്നത്. ഇന്നലെ വൈകുന്നേരമായിട്ടും ലോറി ഇവിടെ നിന്ന് നീക്കം ചെയ്യാത്തതിനെ തുടര്‍ന്ന് ദേശീയപാതയില്‍ കിലോമീറ്ററുകളോളം ഗതാഗത കുരുക്ക് അനുഭവപ്പെട്ടു.