അങ്കമാലി: കാട്ടാനയുടെ ആക്രമണത്തില്‍ യുവാവിന് പരുക്കേറ്റു. ഇല്ലിത്തോട് തൊട്ടിപ്പറമ്പില്‍ വിജയാനന്ദനാ (23) ണ് പരുക്കേറ്റത്.
ഇയാളെ ലിറ്റില്‍ ഫ്‌ളവര്‍ ആശുപത്രിയില്‍ പ്രവേശിപ്പിച്ചു. കോടനാട് ഫോറസ്റ്റ് റേഞ്ചിന്റെ കീഴില്‍ ചേലത്തോടിന് സമീപം വനമധ്യത്തിലൂള്ള റോഡിലൂടെ ഏര്‍മുഖത്തുള്ള ക്യാംപ് ഷെഡ്ഡിലേക്ക് അരിയും മറ്റുസാധനങ്ങളും കൊണ്ട് ബൈക്കില്‍ പോകുമ്പോഴായിരുന്നു അപ്രതീക്ഷിതമായി കാട്ടാനയുടെ ആക്രമണം. ബൈക്കിന്റെ പിറകില്‍ ഇരുന്ന് സഞ്ചരിക്കുകയായിരുന്ന വാച്ചര്‍ എം.എസ് മോഹനന്‍ ഓടിരക്ഷപ്പെടുകയായിരുന്നു.
ബൈക്കില്‍ പോകുന്ന സമയത്ത് പെട്ടെന്ന് മുന്‍പിലേക്ക് വന്ന ആന ആദ്യം ബൈക്ക് തട്ടിവീഴ്ത്തുകയായിരുന്നു. തുടര്‍ന്നാണ് വിജയാനന്ദന് ആനയുടെ ചവിട്ടേറ്റത്. ആക്രമണത്തിന് ശേഷം ബൈക്ക് എടുത്ത് എറിഞ്ഞ ആന കാട്ടിലേക്ക് ഓടിപ്പോയി. വിജയാനന്ദന്റെ ഇടുപ്പെല്ലിന് പൊട്ടലുണ്ടെന്ന് ഓര്‍ത്തോപീഡിക് സര്‍ജന്‍ ഡോ. ബിനു അലക്‌സ് പറഞ്ഞു.