കൊച്ചി: കുട്ടമ്പുഴ ഗ്രാമപഞ്ചായത്തില്‍ വാരിയം മേഖലയില്‍ നിന്നും പന്തപ്ര കോളനിയില്‍ പുനരധിവസിപ്പിച്ച 32 ആദിവാസി കുടുംബങ്ങള്‍ക്ക് കൂടി ഈ മാസം 20ന് കൈവകാവകാശ രേഖ നല്‍കുമെന്ന് കലക്ടര്‍ മുഹമ്മദ് വൈ സഫിറുല്ല അറിയിച്ചു. നേരത്തെ 35 കുടുംബങ്ങള്‍ക്ക് കൈവശാവകാശ രേഖ നല്‍കിയിരുന്നു. ഇതോടെ നിലവിലുള്ള മുഴുവന്‍ അപേക്ഷകളിലും തീരുമാനമായതായി കലക്ടര്‍ വ്യക്തമാക്കി.
തുറന്ന സ്ഥലത്ത് മലവിസര്‍ജനം ഒഴിവാക്കുന്നതിനുള്ള ഒ.ഡി.എഫ് പദ്ധതിയുടെ പുരോഗതി വിലയിരുത്തുന്നതിനായി കഴിഞ്ഞ മാസം കുട്ടമ്പുഴയിലെത്തിയ ജില്ലാ കലക്ടര്‍ക്ക് മുന്നില്‍ ആദിവാസി കുടുംബങ്ങള്‍ കൈവശാവകാശ രേഖ കിട്ടാത്തത് സംബന്ധിച്ച പ്രശ്‌നം അവതരിപ്പിച്ചിരുന്നു. ഒരു മാസത്തിനകം പരിഹാരം കാണുമെന്ന കളക്ടറുടെ വാഗ്ദാനമാണ് ഇതോടെ നിറവേറ്റപ്പെടുന്നത്.
വന്യജീവികളുടെ ശല്യം വര്‍ധിച്ചതോടെയാണ് കാടിനകത്തുള്ള വാരിയം മേഖലയിലെ കുടികള്‍ ഒഴിയാന്‍ ആദിവാസികളെ വനം വകുപ്പ് പ്രേരിപ്പിച്ചത്. 1997 മുതലായിരുന്നു കുടിയിറക്കം. പൂയംകുട്ടി പുഴയുടെ തീരത്ത് കണ്ടംപാറയിലാണ് ആദ്യം ഇവര്‍ കുടില്‍ കെട്ടിയത്. വര്‍ഷകാലത്ത് പുഴ കവിഞ്ഞൊഴുകുന്നത് ഭീഷണിയായതോടെ ഇവരെ പന്തപ്രയിലേക്ക് മാറ്റിപ്പാര്‍പ്പിച്ചു.
പന്തപ്രയില്‍ ഇവര്‍ക്ക് ഭൂമിയും പുനരധിവാസത്തിനുള്ള മറ്റ് സഹായങ്ങളും വാഗ്ദാനം ചെയ്തിരുന്നെങ്കിലും മുഴുവന്‍ പേര്‍ക്കും ഇത് ലഭ്യമാക്കുന്നത് നീണ്ടുപോയി.
കലക്ടര്‍ കഴിഞ്ഞ മാസം സ്ഥലത്തെത്തിയതിനെ തുടര്‍ന്ന് ചേര്‍ന്ന രണ്ട് ജില്ലാതല യോഗങ്ങളിലായാണ് 32 പേരുടെ അപേക്ഷകള്‍ പാസാക്കപ്പെട്ടത്. 24ന് ചേരുന്ന ഊരുകൂട്ടത്തില്‍ വച്ച് കൈവശാവകാശ രേഖകള്‍ വിതരണം ചെയ്യും.