പാലക്കാട്: പൈപ്പില്‍  നിന്നും വെള്ളം പിടിക്കുന്നതിനിടയില്‍ കാട്ടാനയുടെ കുത്തേറ്റ് സംഭവസ്ഥലത്തു തന്നെ മരിച്ച കഞ്ചിക്കോട് കൊയ്യാമരക്കാട് പയറ്റുകാട് സ്വദേശി രായപ്പന് കണ്ണീരോടെ വിടനല്‍കി.
ശനിയാഴ്ച്ച അതിരാവിലെ വീട്ടിനടുത്തുള്ള പൈപ്പില്‍ നിന്നും വെള്ളം പിടിക്കുന്നതിനിടെയാണ് ആന ആക്രമിച്ചത്. രായപ്പന്‍ സംഭവസ്ഥലത്തു തന്നെ മരിച്ചു. ജില്ലാശുപത്രിയില്‍ പോസ്റ്റുമോര്‍ട്ടത്തിന് ശേഷം വൈകിട്ട് കൊയ്യാമരക്കാട് പള്ളിയില്‍ സംസ്‌ക്കരിച്ചു.
രാജപ്പനെ കൊന്ന കാട്ടാന രണ്ടാഴ്ചയായി പരിസരത്ത് അക്രമം നടത്തിയിരുന്നതായി നാട്ടുകാര്‍ പറഞ്ഞു. ഇക്കാര്യം പലതവണ വനം വകുപ്പ് അധികൃതരെ അറിയിച്ചിരുന്നു. സംഭവത്തെ തുടര്‍ന്ന് കാട്ടാന ശല്യത്തിനെതിരേ നടപടി ആവശ്യപ്പെട്ട് സ്ഥലത്ത് നാട്ടുകാര്‍ പ്രതിഷേധിച്ചു.
ജില്ലാ കലക്ടര്‍ സ്ഥലത്തെത്തണമെന്ന് ആവശ്യപ്പെട്ടായിരുന്നു പ്രതിഷേധം. തുടര്‍ന്ന് എം.ബി രാജേഷ് എം.പി, ജില്ലാകലക്ടര്‍ പി മേരിക്കുട്ടി അടക്കമുള്ളവര്‍ സ്ഥലത്തെത്തിയാണ് സ്ഥിതിഗതികള്‍ ശാന്തമാക്കിയത്.
മരിച്ച രാജപ്പന്റെ കുടുംബത്തിന് അഞ്ചുലക്ഷം രൂപ ധനസഹായം അനുവദിച്ചതായി വനം മന്ത്രി കെ രാജു അറിയിച്ചു. സംസ്‌കാര ചടങ്ങുകള്‍ക്കായി 25,000 രൂപയും നല്‍കും. ആശ്രിതര്‍ക്ക് വനംവകുപ്പില്‍ താല്‍ക്കാലിക ജോലി നല്‍കുമെന്നും മന്ത്രി അറിയിച്ചു. മലമ്പുഴ എം.എല്‍.എ വി.എസ.് അച്യുതാനന്ദന്‍ വിഷയം മന്ത്രിയുടെ ശ്രദ്ധയില്‍പ്പെടുത്തിയതിനെതുടര്‍ന്നാണ് നടപടി.