പെരിയ: കേന്ദ്ര സര്‍വകലാശാലയിലെ ആണ്‍കുട്ടികളുടേയും പെണ്‍കുട്ടികളുടേയും ഹോസ്റ്റലുകളായ പെരിയാറും നിളയും കേന്ദ്ര മാനവ വിഭവ ശേഷി വകുപ്പ് സഹമന്ത്രി ഡോ. മഹേന്ദ്രനാഥ് പാണ്ഡെ നിര്‍വഹിച്ചു. വീഡിയോ കോണ്‍ഫറന്‍സ് വഴിയാണ് അദ്ദേഹം ഉദ്ഘാടനം നിര്‍വഹിച്ചത്.
കേന്ദ്രസര്‍വകലാശാല സമത്വവും ഗുണമേന്മയുമുള്ള ആധുനിക ഉന്നതവിദ്യാഭ്യാസം ഉറപ്പ് നല്‍കുന്ന സരസ്വതീ ക്ഷേത്രമാണെന്നു മന്ത്രി പറഞ്ഞു. ജില്ലയില്‍ വിവിധ കേന്ദ്രങ്ങളില്‍ പ്രവര്‍ത്തിക്കുന്ന മുഴുവന്‍ കാമ്പസുകളിലെ  എല്ലാ വകുപ്പുകളും ഒരുവര്‍ഷത്തിനകം പെരിയ കാമ്പസിലേക്കു മാറ്റുമെന്നും പിന്നാക്ക-ദലിത് വിദ്യാര്‍ഥികള്‍ക്കായി രണ്ടു ഹോസ്റ്റല്‍ കെട്ടിടങ്ങള്‍ ഉടന്‍ പണിയുമെന്നും അദ്ദേഹം പറഞ്ഞു.
കേന്ദ്ര സര്‍വകലാശാലയുടെ മെഡിക്കല്‍ കോളജ് കാസര്‍കോട് ജില്ലയില്‍ സ്ഥാപിക്കുന്നതിനു സംസ്ഥാന സര്‍ക്കാര്‍ എല്ലാ പിന്തുണയും നല്‍കുമെന്ന് ചടങ്ങില്‍ സംസാരിച്ച റവന്യു മന്ത്രി ഇ ചന്ദ്രശേഖരന്‍ പറഞ്ഞു. സര്‍വകലാശാലയുടെ തിരുവല്ല, തിരുവനന്തപുരം കാമ്പസുകളില്‍ ഭൂമി ലഭ്യമാക്കുന്നതിനുള്ള നടപടികളും അനുഭാവപൂര്‍വം പരിഗണിക്കുമെന്നു മന്ത്രി പറഞ്ഞു.
വൈസ്ചാന്‍സലര്‍ ഡോ. ജി ഗോപകുമാര്‍ അധ്യക്ഷനായി. സര്‍വകലാശാലാ മാഗസിന്‍ അദ്ദേഹം പ്രകാശനം ചെയ്തു. പി കരുണാകരന്‍ എം.പി കെ കുഞ്ഞിരാമന്‍ എം.എല്‍.എ,  ഫിനാന്‍സ് ഓഫിസര്‍ ഇന്‍ ചാര്‍ജ് ഡോ കെ ജയപ്രസാദ്, രജിസ്ട്രാര്‍ ഇന്‍ ചാര്‍ജ് പ്രോഫ. കെ.പി സുരേഷ് പരീക്ഷാ കണ്‍ട്രോളര്‍ വി ശശിധരന്‍ തുടങ്ങിയവര്‍ സംസാരിച്ചു.