കൊല്ലം: എസ്.എന്‍.ഡി.പി ജനറല്‍ സെക്രട്ടറി വെള്ളാപ്പള്ളി നടേശന്‍ രാഷ്ട്രീയ കച്ചവടക്കാരന്‍ മാത്രമാണെന്ന് കെ.പി.സി.സി പ്രസിഡന്റ് വി.എം സുധീരന്‍. കൊല്ലം പ്രസ്‌ക്ലബില്‍ ജനസഭ 2016ല്‍ സംസാരിക്കുകയായിരുന്നു അദ്ദേഹം. വെള്ളാപ്പള്ളി രാഷ്ട്രീയ കച്ചവടക്കാരനാണെന്നുള്ള കാര്യം താന്‍ നേരത്തെ കണ്ടെത്തിയതാണ്. അദ്ദേഹത്തിന്റെ നിലപാട് വളരെ നേരത്തെ കൃത്യമായി വിലയിരുത്താനും മനസിലാക്കാനും സാധിച്ചെന്നും ബി.ഡി.ജെ.എസ് കച്ചവട താല്‍പര്യം സംരക്ഷിക്കുന്ന ഒരു പാര്‍ട്ടിയാണെന്നും അദ്ദേഹം പറഞ്ഞു. ബി.ഡി.ജെ.എസ് രൂപീകരിച്ചതിന് ശേഷം വെള്ളാപ്പള്ളിയുമായുള്ള എല്ലാ ബന്ധങ്ങളും കോണ്‍ഗ്രസ് അവസാനിപ്പിച്ചിരുന്നു. നിയമസഭാ തെരഞ്ഞെടുപ്പില്‍ പല മണ്ഡലങ്ങളിലും സി.പി.എമ്മും ബി.ഡി.ജെ.എസും തമ്മില്‍ രഹസ്യധാരണയുണ്ടെന്നും സുധീരന്‍ പറഞ്ഞു. മോദി കേരത്തില്‍ പ്രചാരണത്തിനെത്തിയതില്‍ തെറ്റില്ല, എന്നാല്‍ അദ്ദേഹം സോണിയാ ഗാന്ധിയെക്കുറിച്ചും എ.കെ ആന്റണിയെക്കുറിച്ചും തെറ്റായ വിവരങ്ങളാണ് പുറത്തുവിടുന്നത്. ജനങ്ങളില്‍ക്കിടയില്‍ തെറ്റിദ്ധാരണയുണ്ടാക്കി അക്കൗണ്ട് തുറക്കുകയെന്ന ലക്ഷ്യമാണ് മോദിക്കെന്നും അദ്ദേഹം പറഞ്ഞു.