ആലപ്പുഴ: ബി.ജെ.പിയെ വളര്‍ത്തിയാല്‍ യു.ഡി.എഫിന് ഗുണകരമാകുമെന്ന സര്‍ക്കാരിന്റെ ചിന്ത മണ്ടത്തരമാണെന്ന് ആലപ്പുഴ എല്‍.ഡി.എഫ് സ്ഥനാര്‍ഥി ഡോ. ടി.എം തോമസ് ഐസക് പറഞ്ഞു. ആലപ്പുഴ പ്രസ് ക്ലബ്ബ് സംഘടിപ്പിച്ച ജനസമക്ഷം-2016 മുഖാമുഖം പരിപാടിയില്‍ സംസാരിക്കുകയായിരുന്നു അദ്ദേഹം. മുഖ്യമന്ത്രി ഈയിടെയായി ബി.ജെ.പിയെ മഹത്വവല്‍ക്കരിക്കുകയാണ്.വോട്ട് ലഭിക്കാന്‍ ഏത് തന്ത്രവും പയറ്റാന്‍ യു.ഡി.എഫ് തയ്യാറായി കഴിഞ്ഞെന്നതിന് തെളിവാണിത്.മുഖ്യമന്ത്രി ഇപ്പോഴും അരുവിക്കരയില്‍ തന്നെയാണെന്ന് അദ്ദേഹം പരിഹസിച്ചു. ജിഷാ കൊലക്കേസില്‍ പ്രതികളെ പിടിക്കാന്‍ പൊലീസിന് ഇതുവരെ കഴിയാത്തത് യു.ഡി.എഫിന്റെ ശവപ്പെട്ടിയിലെ അവസാനത്തെ ആണിയായി മാറിയിരിക്കുകയാണ്. ജിഷയുടെ ഘാതകരെ കണ്ടുപിടിക്കാത്തത് സ്ത്രീകള്‍ക്കിടയില്‍ യു.ഡി.എഫ് സര്‍ക്കാരിനെതിരെ പ്രതിഷേധം ശക്തമായിട്ടുണ്ട്.കേസ് അന്വേഷണം ഊര്‍ജ്ജസ്വലമായി കൊണ്ടുപോകുന്നതിന് ഉമ്മന്‍ചാണ്ടിയും രമേശ് ചെന്നിത്തലയും ഉദ്യോഗസ്ഥരുടെ മേല്‍ സമ്മര്‍ദം ചെലുത്തുന്നില്ല. അന്വേഷണത്തില്‍ വീഴ്ച വരുത്തുന്ന പൊലീസുകാരെ സസ്‌പെന്‍ഡ് ചെയ്യാനോ ഒരു ലഘു നടപടി പോലും സ്വീകരിക്കാനോ തയ്യാറാകുന്നില്ലെന്ന് തോമസ് ഐസക്ക് കുറ്റപ്പെടുത്തി.എല്‍.ഡി.എഫ് അധികാരത്തിലെത്തിയാല്‍ കൊലപാതകി മുഖ്യമന്ത്രിയാകുമെന്ന പ്രധാനമന്ത്രി മോദിയുടെ പരാമര്‍ശം അദ്ദേഹത്തെ കുറിച്ച് തന്നെയാണെന്ന് ചോദ്യത്തിന് മറുപടിയായി തോമസ് ഐസക്ക് പറഞ്ഞു.എത്രയോ പേരുടെ കൊലപാതകത്തിന് അദ്ദേഹം ഉത്തരവാദിയാണെന്ന് ഐസക്ക് പറഞ്ഞു.എല്‍.ഡി.എഫ് അധികാരത്തില്‍ വന്നാല്‍ ആലപ്പുഴക്ക് നഷ്ടമായ സൗഭാഗ്യങ്ങള്‍ വീണ്ടെടുക്കാന്‍ സാധിക്കുമെന്നും അദ്ദേഹം പറഞ്ഞു.എല്‍ ഡി എഫ് ഭരണകാലത്ത് ജില്ലയിലെ വ്യവസായ സ്ഥാപനങ്ങള്‍ എല്ലാം തന്നെ ലാഭത്തിലായിരുന്നു.എന്നാല്‍ യു.ഡി.എഫ് അധികാരത്തില്‍ വന്നതോടുകൂടി വ്യവസായസ്ഥാപനങ്ങള്‍ അടച്ചുപൂട്ടല്‍ ഭീഷണിയിലായി.ഓരോ കാലത്തും ഭരിക്കുന്ന സര്‍ക്കാരിന്റെ കാഴ്ചപ്പാട് പോലെയാണ് നാടിന് വികസനമുണ്ടാകുന്നത്.ആലപ്പുഴക്കായി പ്രത്യേക പാക്കേജ് നടപ്പാക്കുന്നത് എല്‍.ഡി.എഫിന്റെ പരിഗണനയിലുണ്ടെന്നും അദ്ദേഹം പറഞ്ഞു.