മങ്കട: സെപ്തംബറില്‍ നടക്കുന്ന പരീക്ഷയെഴുതാന്‍ മെയ് ആയിട്ടും പാഠപുസ്തകങ്ങള്‍ ലഭിച്ചില്ല. തുല്യതാ പഠിതാക്കള്‍ക്കാണ് ഈ ഗതികേട്. സംസ്ഥാന സാക്ഷരതാ മിഷന്‍ നടത്തുന്ന പത്താം ക്ലാസ് തുല്യതയുടെ ക്ലാസ് കഴിഞ്ഞ ഡിസംബറിലാണു തുടങ്ങിയത്. സെപ്തംബറിലാണു പരീക്ഷ. എന്നാല്‍ ഇതുവരെ പഠിതാക്കള്‍ക്കു പാഠപുസ്തകങ്ങള്‍ ലഭിച്ചിട്ടില്ല. ഏതാനും പേര്‍ക്കു ചില പുസ്തകങ്ങള്‍ ലഭിച്ചതൊഴിച്ചാല്‍ ബഹുഭൂരിഭാഗം പഠിതാക്കളും പുസ്‌കമില്ലാതെയാണു പഠനം നടത്തുന്നത്. പത്താം ക്ലാസില്‍ മലയാളം, ഇംഗ്ലീഷ്, ഹിന്ദി എന്നീ ഭാഷാ പുസ്തകങ്ങളും ഗണിതം, സാമൂഹ്യ ശാസ്ത്രം, ജീവശാസ്ത്രം, ഊര്‍ജതന്ത്രം, രസതന്ത്രം, ഐ.ടി എന്നിങ്ങനെ ഒന്‍പതു പുസ്തകങ്ങളാണുള്ളത്. 1500 രൂപ പുസ്തകങ്ങളുള്‍പ്പെടെ കോഴ്‌സ് ഫീസായി പഠിതാക്കള്‍ അടച്ചിരുന്നു. എന്നിട്ടും പുസ്തകം ലഭിച്ചില്ലെന്നാണു പഠിതാക്കള്‍ പരാതിപ്പെടുന്നത്.