നാഗ്പുര്‍: കേരളവും വിദര്‍ഭയും തമ്മിലുള്ള സി.കെ നായിഡു ട്രോഫി അണ്ടര്‍ 23 ചതുര്‍ദിന പോരാട്ടം സമനിലയില്‍. ആദ്യം ബാറ്റു ചെയ്ത വിദര്‍ഭ ഒന്നാം ഇന്നിങ്‌സില്‍ 307 റണ്‍സിനു പുറത്തായപ്പോള്‍ കേരളത്തിന്റെ ആദ്യ ഇന്നിങ്‌സ് 216 റണ്‍സില്‍ അവസാനിപ്പിച്ച് അവര്‍ 91 റണ്‍സിന്റെ ലീഡ് സ്വന്തമാക്കി. രണ്ടാം ഇന്നിങ്‌സില്‍ വിദര്‍ഭ ഏഴു വിക്കറ്റ് നഷ്ടത്തില്‍ 202 റണ്‍സെന്ന നിലയില്‍ ഡിക്ലയര്‍ ചെയ്ത് 294റണ്‍സിന്റെ വിജയ ലക്ഷ്യം കേരളത്തിനു മുന്നില്‍ വച്ചു.
വിജയത്തിലേക്ക് ബാറ്റു വീശിയ കേരളം ഒന്‍പതു വിക്കറ്റിനു 240 റണ്‍സെടുത്തു നില്‍ക്കെ മത്സരം സമനിലയില്‍ അവസാനിപ്പിക്കാന്‍ തീരുമാനിക്കുകയായിരുന്നു. കേരളത്തിനായി എസ്. നിസാര്‍ 81 റണ്‍സുമായി പുറത്താകാതെ നിന്നു. ആദ്യ ഇന്നിങ്‌സിലെ ലീഡിന്റെ ബലത്തില്‍ വിദര്‍ഭയ്ക്ക് മൂന്നു പോയിന്റ്.