തൃശൂര്‍: ദേശീയ പെന്‍ഷന്‍ പദ്ധതിയില്‍ അംഗമായവര്‍ മരണപ്പെട്ടാല്‍ മരണമടഞ്ഞ ജീവനക്കാരന്‍ അവസാനം വാങ്ങിയ ശമ്പളത്തിന് തുല്യമായ തുക ആശ്രിതര്‍ക്ക് സമാശ്വാസ തൊഴില്‍ദാന പദ്ധതി പ്രകാരം ജോലി ലഭിക്കുന്നതു വരെ ആശ്വാസ ധനസഹായമായി അനുവദിക്കുവാന്‍ 26-12-2012 ല്‍ യു.ഡി.എഫ് മന്ത്രിസഭ എടുത്ത തീരുമാനം അട്ടിമറിച്ച് ആശ്വാസ ധനസഹായം കുറക്കുവാന്‍ എല്‍.ഡി.എഫ് മന്ത്രിസഭ കൈക്കൊണ്ട തീരുമാനം പുന:പരിശോധിക്കാനും, ആശ്വാസ ധനസഹായം വെട്ടിക്കുറച്ച 31-08-2016 ലെ സര്‍ക്കാര്‍ ഉത്തരവ് പിന്‍വലിക്കുവാനും തയ്യാറാകണമെന്ന് എന്‍.ജി.ഒ അസോസിയേഷന്‍ ജനറല്‍ സെക്രട്ടറി എന്‍.കെ ബെന്നി സര്‍ക്കാരിനോട് ആവശ്യപ്പെട്ടു. നിയമസഭാ തെരഞ്ഞെടുപ്പു കാലത്ത് എന്‍.പി.എസില്‍ അംഗമായ ജീവനക്കാരുടെ വോട്ടുകള്‍ തട്ടിയെടുക്കുന്നതിനു വേണ്ടി, എന്‍.പി.എസ് പുന:പരിശോധിക്കുമെന്ന് പ്രകടന പത്രികയില്‍ വാഗ്ദാനം നല്‍കി അധികാരത്തിലെത്തിയ ഇടതു സര്‍ക്കാരില്‍ സമ്മര്‍ദ്ദം ചെലുത്തി ഉത്തരവ് റദ്ദ് ചെയ്യിപ്പിക്കുവാനുളള ഉത്തരവാദിത്വം നിര്‍വഹിക്കുവാന്‍ തയ്യാറാകണമെന്ന് അദ്ദേഹം ഭരണാനുകൂല സംഘടനകളോട് അഭ്യര്‍ഥിച്ചു. ആശ്വാസ ധനസഹായം വെട്ടിക്കുറച്ച ഉത്തരവ് പിന്‍വലിക്കും വരെ ശക്തമായ പ്രക്ഷോഭ പരിപാടികള്‍ക്ക് അസോസിയേഷന്‍ രൂപം നല്‍കുമെന്നും അദ്ദേഹം പറഞ്ഞു.   എന്‍.പി.എസ് - ആശ്വാസ ധനസഹായം വെട്ടിക്കുറച്ച ഉത്തരവ് പിന്‍വലിക്കണമെന്നാവശ്യപ്പെട്ട് എന്‍.ജി.ഒ അസോസിയേഷന്‍ തൃശൂര്‍ ജില്ലാ കമ്മിറ്റിയുടെ ആഭിമുഖ്യത്തില്‍ നടത്തിയ കലക്ടറേറ്റ് മാര്‍ച്ചും ധര്‍ണയും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ജില്ലാ പ്രസിഡന്റ് കെ.പി ജോസ് അധ്യക്ഷനായി. സംസ്ഥാന വൈസ് പ്രസിഡന്റ് ഇ.കെ അലിമുഹമ്മദ് മുഖ്യപ്രഭാഷണം നടത്തി. ജില്ലാ സെക്രട്ടറി സന്തോഷ് തോമസ്, സംസ്ഥാന സെക്രട്ടേറിയറ്റ് അംഗങ്ങളായ സി.ജെ വില്‍സന്‍, കെ.ബി ശ്രീധരന്‍, ടി.പി ഹനീഷ്‌കുമാര്‍, എ.നിഖില്‍മോഹന്‍, ജില്ലാ ഭാരവാഹികളായ എം.ഒ ഡെയ്‌സന്‍, ടി.ജി രഞ്ജിത്ത്, കെ.എസ് മനോജ്, കെ.എച്ച് രാജേഷ്, ഇ.രൂപേഷ്, ഇ.എസ് അജിത്ത്കുമാര്‍, സി.കെ ബാലന്‍ എന്നിവര്‍ പ്രസംഗിച്ചു.